Xitay metbu'atlirida cherchen nahiyeside “Yiltiz tartqan” xitay oqughuchiliri medhiyelen'gen

Xébéy ölkisi bawding institutining 2000-yil oqush püttürgen oqughuchiliri wekilliri 2014-yil xitay re'isi shi jinpinggha xet yézip, özlirining “Shinjangda yiltiz tartqan 14 yilliq xizmet we turmush hayati” din doklat bergen. Shi jinpingmu ulargha jawab xet yézip, “Chégra rayonni qoghdash we güllendürüshke töhpe qoshuwatqan silerdek yashlardin pexirlinimen” dégen.

Xitayche “Tengritagh tori” da alahide teshwiq qilin'ghan bu xewerde, 2000-yil bawding institutini püttürgen 15 neper xitay oqughuchining cherchen nahiyesige bérip, bir turghanche 22 yil turup yerliship ketkenliki, ularning ichide birsining cherchen nahiyelik 1-ottura mektepning mu'awin mudiri bolghanliqi, 22 yil mabeynide ularning “Nurghun munewwer oqughuchilarni terbiyeligenliki” medhiyelen'gen.

Xewerde körsitilishiche, 15 neper xitay oqughuchining köp qismi cherchen nahiyelik 1-ottura mektepke kélip sinip mes'uli bolghan. Bu mektepke 100 milyondin artuq meblegh sélin'ghan bolup, bügünki künde 1100 oqughuchi oquydighan yataqliq toluq ottura mektepke aylan'ghan.

Tehlilchilerning qarishiche, bu yataqliq toluq ottura mektep belkim xitayning Uyghur ata-anilarni türme-lagérlargha, balilirini bolsa yataqliq mektepke solap terbiyelishining mehsuli؛ xitay hökümiti yene bu yil ichkiri xitaydin oqush püttüridighan oqughuchilarni Uyghur rayoni we bingtu'en'ge bérishqa seperwer qilishi mumkin؛ bu xil xewerler shuning élan-teshwiqati hésablinidu.