Xitay hökümiti yuqiri teminat bilen xitay küchmenlirini Uyghur rayonigha orunlashturmaqta

Muxbirimiz erkin
2018-06-08
Élxet
Pikir
Share
Print

Xitay hökümitining xitay köchmen déhqanlirini Uyghur rayonigha térilghu yer, turalghu öy, ijtima'iy salametlik sughurtisi, ma'arip qatarliq jehetlerde zor imtiyazlarni bérip yötkewatqanliqi ashkarilandi.

Xitay sina torida élan qilin'ghan bir resimlik xewerde bayan qilinishiche, xitayning Uyghur rayonidiki "Shinjang ishlepchiqirish-qurulush bingtu'eni" 2017‏-yili 2‏-aydin bashlap uning her qaysi diwiziye, polklirigha ichkiridin xitay déhqanlirini qobul qilish programmisini yolgha qoyghan.

Mezkur programma nishanliq halda gensuning namrat rayonliridiki xitay déhqanlirini yötkeshke qaritilghan bolup, xitay déhqanlirining Uyghur rayonigha "Pilanliq, teshkillik we kölemlik yötkep ishqa orunlashturuliwatqanliqi" bildürülgen.

Halbuki mezkur programma xitay hökümitining Uyghur yashlirini "Yéza éshincha emgek küchi" dégen namda ichkiri ölkilerge yötkep "Ishqa orunlashturiwatqan" mezgilde yolgha qoyulghan. Xitayning Uyghur yashlirini "Yötkep ishqa orunlashturush" programmisi Uyghur kishilik hoquq teshkilatlirining tenqidige uchrighan. Ular xitay ahalilirini Uyghur rayonigha köchürüp, Uyghurlarni ichkirige yötkeshning gherezlik siyasiy pilan ikenliki, uning Uyghurlarni assimilyatsiye qilishni meqset qilghanliqini ilgiri sürüp keldi.

Sina torining xewiride bu yil 8‏-april küni Uyghur rayonining tumshuq shehiridiki bingtu'en 50‏-polkigha kélip orunlashqan bir xitay déhqan a'ilisining heqsiz 70 mö térilghu yer, yéngi sélin'ghan qoro- jaygha érishkenliki, uninggha yene zörür a'ile jahazliri we turmush buyumlirining heqsiz toluqlap bérilgenliki ilgiri sürülgen.

Xitay déhqanlirigha bérilgen térilghu yerning yéngi échilghan boz yerliki yaki yerlikning térilghu zémini ikenliki melum emes. Da'iriler yéqinda Uyghur rayonining jenubida térilghu yerlerni qayta éniqlap, bir qanche milyon modin artuq térilghu yerni ayturiwatlghanliqini élan qilghan idi.

Toluq bet