Xitay köchmen ahalilirini nopusqa élish xizmiti heqqide mexsus höjjet chiqirilmaqta

Muxbirimiz eziz
2018-09-04
Share

Bir qisim mutexessisler "Uyghurlar diyaridiki assimilyatsiyening bir wasitisi" dep qarap kéliwatqan ichkiridin zor sanda xitay nopusini köchürüsh herikitining nöwette yerlik hökümetlerning zor küch bilen qollishi astida ijra boluwatqanliqi melum boldi.

Toqsu nahiyelik partkom we hökümet buningdin ikki ay ilgiri "Sirttin kelgen nopusni tizimgha aldurushqa righbetlendürüsh charisi" ni élan qilip, xitay köchmen ahalilirini shu jayda nopusqa aldurushqa ilhamlandurghan.

Mezkur uqturushta körsitilishiche, ichkiridin köchüp kelgen xitay ahaliliri parawanliq, dawalinish, olturaq öy, nopus béjirish qatarliq türlerde bashqilargha oxshash mu'amilidin behrimen bolidiken, ularning perzentliri shu jaydiki yerlik ösmürlerge oxshash ma'arip hoquqidin behrimen bolidiken. Bolupmu bu uqturushtiki:"Sirttin kelgen xitay nopusining ishqa orunlishish we igilik tiklesh ishlirigha, shundaqla yerlerni höddige élishigha alahide étibar bérilidu؛ nopusqa aldurush resmiyetliri addiylashturulup, ammiwi mulazimet yaki alahide kesip bilen shughullan'ghuchi xitaylarni jismaniy jehettin qoghdash mulazimiti bilen temin étilidu" dégen maddilar kishilerning alahide diqqitini qozghawatqanliqi melum.

Melum bolushiche, xitaydiki nopus kontrolluqi dunyada mislisiz bolup, Uyghurlar diyarining özide Uyghurlarning bir sheherdin yene bir sheherge nopus yötkishi asman'gha chiqishtinmu qiyin hésablinidiken. Emma ichkiridin köchüp kelgen xitaylarni yerlik hökümetning nopusigha tizimlitish xizmitining bunche zor imtiyazliq tedbirler bilen ijra bolushini beziler "Köchmen xitaylardiki qorqunch tuyghusiningmu éship bériwatqanliqini wasitilik halda körsitidu" dep qarimaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet