“Gherbiy qisimgha yardem bérish” namidiki xitay köchmenliri ürümchige kelgen

Xitay hökümitining “Gherbke yardem bérish pida'iyliri” dep atalghan zor türkümdiki köchmenler qoshuni 13-séntebir küni ürümchige yétip kelgen hemde bu jaydin herqaysi wilayet we nahiyelerge teqsimlen'gen.

“Xitay xewerliri” torining 14-séntebirdiki xewiride éytilishiche, xitay ölkiliridin yighilghan alte minggha yéqin oqughuchi “Shinjanggha yardem bérish” namida herqaysi jaylargha bérip ma'arip, tébbiy sahe, asasiy qatlam rehberlik guruppisi qatarliq orunlargha ishqa chüshidiken. Xewerde bu oqughchilarning “Merkez türi” we “Yerlik tür” dégen ikki tür boyiche toplan'ghanliqini, bulardin 60 pérsentining “Merkez türi” boyiche toplan'ghan oqughuchilar ikenliki éytilghan.

Melum bolushiche, bu xildiki “Oqughuchi yötkesh arqiliq shinjanggha yardem bérish” pa'aliyiti 2003-yilidin étibaren dawam qiliwatqan bolup, hazirghiche 24 mingdin artuq xitay oqughuchi mushu shekilde ishqa orunlashturulghan iken. Amérikadiki musteqil közetküchi élshat hesen bu toghrisida pikir qilip: “Nopus yötkesh herqandaq mustemlikichi hakimiyet birinchi bolup ijra qilidighan tedbirlerdur. Bu xildiki ichkiride ishsiz qalghan yarimas oqughuchilarni sherqiy türkistan'gha yuqiri ma'ash bilen teklip qilip ishqa élish yene bir yaqtin sherqiy türkistan tewesidin qéchip kétiwatqan xitay kadirlirining ornini toldurushnimu meqset qilidu,” dédi.