Uyghur diyarida partiye sirtidiki ziyaliylarningmu kompartiyege egishishi tekitlenmekte

Ötken yillardin buyan Uyghur diyarida keng omumlashturulghan “Partiyege egishish” we “Partiyening sözini anglash” teshwiqati nöwette izchil dawam qiliwatqan bolup, emdilikte xitay kompartyesining sirtidiki partiye-guruhlargha mensup ziyaliylarningmu xitay kompartiyesige egishish mejburiyitining barliqi tekitlinishke bashlighan.

Xitay hökümiti bashqurushidiki “Xitay xewer tori” ning 25-apréldiki xewiride éytilishiche, Uyghur aptonom rayonluq partkom qarmiqidiki birliksep bölümi yéqinda mexsus yighin échip kompartiye sirtidiki démokratik partiye we guruhlargha eza ziyaliylarning “Chin qelbi bilen partiyege egishishi” kéreklikini alahide otturigha qoyghan. Birliksep bölümining bashliqi zumret obul yighinda alahide söz qilip “Partiyesiz zatlar we partiye sirtidiki ziyaliylar partiyemiz bilen bir dilda bolushi, shuningdek döletni söyüp öz hessisini béghishlashni dawam qildurushi kérek” dégen. Shuningdek buning yéqinda échilish aldida turghan xitay kompartiyesining 20-qurultiyini kütüwélish, shuningdek ijtima'iy muqimliq we uzun mezgillik eminlik berpa qilishtek bash nishan üchün xizmet qilish bolidighanliqini tekitligen.

Melum bolushiche, xitay xelq jumhuriyiti qurulghanda merkiziy hökümet özlirining démokratiye prinsiplirigha emel qilidighanliqini namayan qilish üchün xitay kompartiyesidin bashqa birnechche partiyening mewjut bolushigha yol qoyghan. Emma bularning héchqaysisi hakimiyet sahesige yéqin keltürülmigenidi. Emdilikte bularningmu xitay kompartiyesige egishishke mejburlinishi mahiyette xitay kompartiyesining bir partiyelik hakimmutleqliqining üzül-késil ashkara bolghanliqining béshariti, dep qaralmaqtiken.