Gherb we sherqning közidiki xitay kompartiyesi

Muxbirimiz eziz
2020-08-04
Élxet
Pikir
Share
Print

Hakimiyetni qolgha alghinigha yetmish yil bolghan xitay kompartiyesi ötmüshtiki türlük tenqidlerge sewebchi bolghan heqlerni depsende qilish qilmishlirini bashtin kechürüp yéqinqi mezgillerdiki xongkong démokratiye namayi'ishi, tajsiman wirusi bilen birlikte yamrighan iqtisadiy weyranchiliq, kemdin-kem körülidighan éghir kelkün qatarliqlar tüpeylidin xéli obdanla halsirap qalghandek körün'genidi. Emma yéqinqi ehwallar nöwettiki ré'alliqning xitay üchün özini téximu küchep teshwiq qilidighan purset bolup qalghanliqini körsetmektiken.

"Washin'gton pochtisi" gézitining 3-awghusttiki maqaliside körsitilishiche, xitay kompartiyesining "Biz wirusni ongushluq kontrol qilduq. Emma amérika undaq qilalmidi" dégendek teshwiqatliri xitay ichide "Dölitimiz qudret tapqanliqi üchün gherb bizni körelmeywatidu" dégen chüshenchige orun hazirlimaqtiken. Yene kélip xitayning tashqi dunyagha mensup xewerlerni qatmu-qat "Süzgüch" lerdin ötküzüshi xitaydiki kishilerni asasen "Gas" qilip qoymaqta iken. Yene bir yaqtin xitayda kompartiye ezasi bolush "Parlaq kelgüsi" hemde yaxshi xizmet we emel tutushtiki muhim "Ötkel" bolghachqa barghanséri köp sandiki xitay yashliri kompartiye ezasi bolushqa intilidiken. Bu xildiki xitay yashliri bolsa "Xitayche alahidilikke ige milletchilik" bilen méngisi yuyulghan kishiler bolghachqa ular xitaydiki diktatorining yolbashchisi bolghan shi jinpingning esebiy egeshküchiliri bolup qalmaqtiken. Bu guruh bolsa nöwette hakimmutleqliq we diktatorini pütün dunyagha kéngeytish üchün héchqandaq wasite tallimaydiken.

Xitaydiki mushu xil ré'alliqni tonup yetken tramp hökümiti nöwette xitay kompartiyesining barghanséri amérika üchün zor bir tehdit bolup qéliwatqanliqini tonup yetmektiken. Chünki xitay kompartiyesi alliqachan tarixning exlet sanduqigha tashlan'ghan sowét dewridiki kompartiyeni nurghun jehetlerde öz eyni qaytidin namayan qilmaqtatiken. Buning bilen tramp hökümiti bu mesilige qarshi tedbir élishni alliqachan bashliwetken. Buning eng deslepki ipadisi amérika hökümitining "Xitay kompartiyesi ezaliri hemde ularning bala-chaqilirini amérika chégrasidin kirishni cheklesh" mesilisini muhakimige qoyushida ipadilen'gen. Eger bu resmiy emelge ashsa u halda xitaydiki 92 milyon partiye ezasi hemde ularning bala-waqisi bolup jem'iy 270 milyonche kishi amérikagha kirishtin men'i qilinidiken. Amérika tashqi ishlar ministiri mayk pompéyo del mushu xil ehwalni közde tutup buningdin bir ay ilgiri nikson kutupxanisida sözligen nutqida "Xitay kompartiyesining zomigerlik layihesini bit-chit qilish hemde kommunistlar kontrolluqidiki xitayni heqiqiy yosunda özgertish" ni otturigha qoyghan.

Nöwette amérika-xitay munasiwitining barghanséri "Soghuq urush" tüsini élishi amérika hökümitining bundin kéyinki xitay siyasitide mushu xildiki chare-tedbirlerning asasiy salmaqni igilishini texmin qilmaqtiken.

Toluq bet