Xitay terep xelq'ara tenqidlerge qayturma zerbe bérishni kücheytmektiken

Muxbirimiz jewlan
2021-04-09
Share

Xitayning qilmish-etmishliri jahan'gha ashkare bolup, qabahetning wekili süpitide eyibliniwatqan bu künlerde xitay teshwiqat wasitiliri özini aqlap, xelq'araning tenqidlirige qayturma zerbe bérishni üzlüksiz dawamlashturmaqtiken.

"Jenubiy xitay seher pochiti'isi" géziti 9-aprél élan qilghan bir xewerde éytilishiche, bir xitay emeldari awstaraliyening kenbérra shehiridiki bir tetqiqat orgini békitip chiqqan yéngi lagérlargha a'it 90 pirsent uchurni xatagha chiqarghan؛ Uyghur aptonom rayonluq hökümetning bayanatchisi shüy guyshyang béyjingda ötküzülgen axbarat élan qilish yighinida "Lagér déyilgen 380 bina ichide 343 binaning mektep, hökümet binasi, doxturxana, a'ile qorusi we soda dukanliri ikenliki" ni éytqan hemde bu binalargha a'it sanliq melumatlarni "Amérikaning yardimini alghan xitaygha qarshi küchlerning oydurup chiqarghanliqi" ni bildürgen. Emma u qalghan 37 binaning qandaq bina ikenlikini éytmighan.

Shü guyshyang yene shinjang sanliq melumat qurulushining 3 sanliq melumat ambiridin teshkil tapqanliqini, qalghan ikki sanliq melumat ambirining birining Uyghur rayonida ziyankeshlikke uchrighuchilar uchur ambiri we Uyghur waqitliq edliye ambiri ikenlikini éytqan hemde bu sanliq melumat ambarlirini xitaygha qarshi teshkilatlarning berpa qilghanliqini, bulargha amérika qatarliq gherb döletlirining iqtisadiy yardem bergenlikini bildürgen.

Analizchilerning qarishiche, xitayning bu üch sanliq melumat ambirini alahide tilgha élip, uninggha yardem bergen döletlernimu eyblishi xitayning bu jinayet pakitlirining haman bir küni ashkarilinip, öz jinayetliri üchün polattek delil bolup qélishidin ensireydighanliqini ipadileydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet