Хитай һөкүмити чәтәл дипломатлири вә хәлқара тәшкилатларға лагерлар һәққидә доклат бәргән

Мухбиримиз әркин
2019-02-25
Share

Хитай һөкүмити өткән җүмә күни бейҗиңда 80 дәк дөләт дипломати вә хәлқара тәшкилатларниң вәкиллирини тәклип қилип, уларға "қайта-тәрбийәләш" намидики йиғивелиш лагерлири һәққидә доклат бәргән.

Ройтерс агентлиқиниң 24‏-феврал күни бәргән хәвиридә қәйт қилинишичә, йиғинда уйғур аптоном райониниң муавин рәиси әркин туняз билән хитай муавин ташқи ишлар министирлиқиниң муавин министири җаң хәнхуй доклат бәргән болуп, улар йиғинда "шинҗаңниң тәрәққиятида қолға кәлтүргән нәтиҗилири" ни вә шундақла "террорлуқ вә радикаллиққа қарши турушта алған алдини елиш характерлик тәдбирлири" ни чүшәндүргән.

Йиғинда җаң хәнхуй "шинҗаңниң террорлуқ вә радикаллиққа қарши туруш тәдбирлири бу кесәлликни давалаш, шундақла террорлуқтәк йәр шари характерлик бир қийин мәсилини һәл қилишниң методини яратти. Бу алқишлинишқа тегишлик" дегән.

Ройтерсниң хәвиридә илгири сүрүлүшичә, бу, хитайниң лагерлар мәсилисидә мусулман дөләтлириниң тәнқидигә учрашниң алдини елиш үчүн елип бериватқан урунуши икән.

Хитай һөкүмити б д т кишилик һоқуқ кеңишиниң 40 ‏-нөвәтлик йиғини башлинишниң дәл һарписида бейҗиңдики чәтәл дипломатлирини вә хәлқара тәшкилатлар вәкиллирини тәклип қилип, бу доклатни бәргән.

Буниң алдида хитай һөкүмити мисир, бангладәш, пакистан, венезуела, судан, русийә дегәндәк дөләтләрниң бейҗиңда турушлуқ дипломатлирини тәшкилләп, уйғур аптоном районини зиярәт қилдурған. Лекин кишилик һоқуқ тәшкилатлири униң лагерларни пәрдазлап, сахтипәзлик қилғанлиқини илгири сүргән.

Хәлқара кишилик һоқуқ тәшкилатлири вә ғәрб таратқулири йиғинниң һарписида б д т кишилик һоқуқ кеңишиниң һәйәт тәшкилләп, уйғур аптоном районида тәкшүрүш елип беришини тәләп қилған иди.

Ройтерсниң хәвиридә билдүрүлүшичә, хитай ташқи ишлар министирлиқи йәкшәнбә күни ройтерс агентлиқиниң мухбириға бәргән учурида 80 дәк дөләт вә хәлқара тәшкилатниң бейҗиңда турушлуқ дипломат вә вәкиллиригә лагерлар һәққидә доклат берилгәнликини дәлиллигән.

Америка һөкүмитиниң илгири сүрүшичә, нөвәттә 800 миңдин 2 милйонғичә уйғур вә башқа мусулман хәлқләр бу лагерларда тутуп турулмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт