Xitay hökümiti chet'el diplomatliri we xelq'ara teshkilatlargha lagérlar heqqide doklat bergen

Xitay hökümiti ötken jüme küni béyjingda 80 dek dölet diplomati we xelq'ara teshkilatlarning wekillirini teklip qilip, ulargha “Qayta-terbiyelesh” namidiki yighiwélish lagérliri heqqide doklat bergen.

Roytérs agéntliqining 24‏-féwral küni bergen xewiride qeyt qilinishiche, yighinda Uyghur aptonom rayonining mu'awin re'isi erkin tunyaz bilen xitay mu'awin tashqi ishlar ministirliqining mu'awin ministiri jang xenxuy doklat bergen bolup, ular yighinda “Shinjangning tereqqiyatida qolgha keltürgen netijiliri” ni we shundaqla “Térrorluq we radikalliqqa qarshi turushta alghan aldini élish xaraktérlik tedbirliri” ni chüshendürgen.

Yighinda jang xenxuy “Shinjangning térrorluq we radikalliqqa qarshi turush tedbirliri bu késellikni dawalash, shundaqla térrorluqtek yer shari xaraktérlik bir qiyin mesilini hel qilishning métodini yaratti. Bu alqishlinishqa tégishlik” dégen.

Roytérsning xewiride ilgiri sürülüshiche, bu, xitayning lagérlar mesiliside musulman döletlirining tenqidige uchrashning aldini élish üchün élip bériwatqan urunushi iken.

Xitay hökümiti b d t kishilik hoquq kéngishining 40 ‏-nöwetlik yighini bashlinishning del harpisida béyjingdiki chet'el diplomatlirini we xelq'ara teshkilatlar wekillirini teklip qilip, bu doklatni bergen.

Buning aldida xitay hökümiti misir, ban'gladesh, pakistan, wénézu'éla, sudan, rusiye dégendek döletlerning béyjingda turushluq diplomatlirini teshkillep, Uyghur aptonom rayonini ziyaret qildurghan. Lékin kishilik hoquq teshkilatliri uning lagérlarni perdazlap, saxtipezlik qilghanliqini ilgiri sürgen.

Xelq'ara kishilik hoquq teshkilatliri we gherb taratquliri yighinning harpisida b d t kishilik hoquq kéngishining hey'et teshkillep, Uyghur aptonom rayonida tekshürüsh élip bérishini telep qilghan idi.

Roytérsning xewiride bildürülüshiche, xitay tashqi ishlar ministirliqi yekshenbe küni roytérs agéntliqining muxbirigha bergen uchurida 80 dek dölet we xelq'ara teshkilatning béyjingda turushluq diplomat we wekillirige lagérlar heqqide doklat bérilgenlikini delilligen.

Amérika hökümitining ilgiri sürüshiche, nöwette 800 mingdin 2 milyon'ghiche Uyghur we bashqa musulman xelqler bu lagérlarda tutup turulmaqta iken.