Xitay “Qanun'gha boy sunidighan” ziyaretchilerning Uyghur diyarida tekshürüishte bolushigha yol qoyidighanliqini bildürdi

Xitay tashqi ishlar ministérliqining bayanatchisi lu kang bügün, yeni 7‏-mart küni béyjingdiki axbarat élan qilish yighinida “Ita'etchan”, yeni xitayning qanunlirigha boy sunidighan chet'ellik ziyaretchilerning Uyghur aptonom rayonida tekshürüsh we ziyarette bolushigha yol qoyidighanliqini bildürgen.

B d t kishilik hoquq komitétining Uyghur aptonom rayonining weziyitini musteqil tekshürüsh heqqidiki chaqiriqigha naraziliq bildürgen xitay tashqi ishlar ministérliqining bayanatchisi lu kang xitay terepning “Siyasiy meqsetni chiqish qilghan yaki xitayning dölet menpe'etige ziyanliq bolghan” tekshürüshlerge yol qoymaydighanliqini tekitligen. Xitay bayanatchisi lu kang sözide yene b d t ning alaqidar organlirini b d t ning asasiy nizam-pirinsiplirigha emel qilishqa dewet qilghan.

Bügün radiyomiz arqiliq inkas qayturghan dunya Uyghur qurultiyining bayanatchisi dilshat rishit, xitay bayanatchisi lu kangning bu sözlirini “Xitayning lagérlar weziyitini dunyadin yoshurushni dawamlashturidighanliqining bir ipadisi,” dep eyiblidi.

Lu kang sözide yéqinqi mezgillerde Uyghur aptonom rayonini köpligen döletler wekilliri we muxbirlirining ziyaret qilghanliqini, bu ziyaretler dawamida ularning nahayiti mol we toghra bolghan uchurlargha érishkenlikini ilgiri sürgen. D u q bayanatchisi dilshat rishit buninggha jawaben Uyghur aptonom rayonini xitay terep telep qilghan “Ita'etchan” tekshürgüchiler emes, belki musteqil tekshürgüchilerning tekshürüshining zörürlükini eskertken.