Analizchilar: xitay ma'aripida bashlan'ghan “Töt tarixni öginish” dolquni Uyghur rayonida ewjige chiqidu

Xitay taratqulirining xewerliridin melum bolushiche, Uyghur aptonom rayonluq partkom partiye tarixini öginish rehberlik ishxanisi merkezning chaqiriqigha qizghin awaz qoshup, 17-may küni yash-ösmürlerning “Töt tarix” ni öginish ma'arip xizmiti söhbet yighini achqan. Yighinda partiye tarixini merkez qilghan “Töt tarix” ni öginishni her qaysi mekteplerde omumlashturush we teshwiq qilish xizmiti orunlashturulghan.

“Töt tarixni öginish” dégini “Xitay kompartiyesining tarixini öginish, yéngi xitay tarixini öginish, islahat-échiwétish tarixini öginish, sotsiyalizmliq tereqqiyat tarixini öginish” ni körsitidiken. Bu tarixlarda asasen xitay kompartiyesining “Xelqning bexti, milletning güllinishi, dunyaning ortaq menpe'eti” üchün qandaq küreshlerni qilghanliqi sözlinidiken. Partiye rehberlirining küresh hayati “Töt tarix” ning asasiy liniyesini teshkil qilidiken.

Analizchilarning qarishiche, atalmish “Töt tarix” ni öginish dolquni xitay re'isi shi jinping qozghighan memliket xaraktérlik ménge yuyush herikiti bolup, xitayning ma'arip saheside solchil siyasetke éghiwatqanliqi we “Medeniyet zor inqilabi” dewrige qarap chékiniwatqanliqining roshen alamiti iken. Ularning qarishiche, xitay merkizi hökümiti bundaq dolqunni peyda qilghan haman Uyghur rayonida u ewjige chiqidiken, yeni bu siyaset téz sür'ette ijra qilinidiken, shundaqla wezipiler ashurup orunlinidiken.