Amérika siyasetchiliri xitay mallirining kirishige yol qoyidighan eng kichik yochuqlarnimu étish tedbiri almaqta

Amérika awam palatasi re'isi mayk jonson (Mike Johnson) nyu-york aksiyeside amérikaliq tijaretchilerge sözligen nutqida, amérikaning xitaydin kéliwatqan mejburiy emgek mehsulatlirigha taqabil turush üchün dawamliq xizmet qilidighanliqini éytqan.

U sözide, Uyghur mejburiy emgikige chétishliq mehsulatlarning amérika tamozhnisidiki “Eng töwen chek” qa'idisi boyiche posulka halitide amérika bazirigha kirishtek ehwalgha xatime bérishni meqset qilghan qanunlarni tüzüsh hemde mejburiy emgek mehsulatlirigha zerbe béridighan qanunlar üstide dawamliq ishlewatqanliqini bildürgen. U mundaq dégen:

“Her ikki partiye ezaliri mejburiy emgekke taqabil turush hemde eng töwen chek qa'idisini suyi'istémal qiliwatqan xitay karxanilirigha zerbe béridighan qanunlar üstide ishlewatidu”

Awam palata ezasi mayk jonson 1-öktebir künidiki bu sözide, xitaygha taqabil turush mesilisi üstide toxtilip mundaq dégen: “Xitayning bizning emgikimiz we téxnikimizni oghrilaydighan, soda kélishimidin paydilinip ishlepchiqirishimiz we kesiplirimizge ziyan yetküzidighan qilmishlirini bosh qoyuwétidighan künler ötüp ketti. Aldinqi ayda, awam palatasi 20 nechche qanun layihesini maqullap, xitayning sodini suyi'istémal qilish we bashqa nachar soda adetlirige taqabil turdi. Biz maqullighan biyologiyelik bixeterlik qanuni buning bir misalidur”.

Uning körsitishiche, bu qanun amérikiliqlarning saghlamliqigha da'ir sanliq melumatlirini qoghdaydighan we xitay bashqurushidiki bi'o-téxnika shirketliri bilen tüzülidighan dölet toxtamlirini toxtitidighan qanun iken. U buni her ikki partiyedin bolghan mejlis ezalirining ortaq ghelibisi, dep atighan.

Awam palata re'isi mayk jonson sözide yene, nöwette amérikada köpligen kishilerning amérikaliqlarning meblighining xitaygha, jümlidin xitay armiyesining küchlinishige yardem bériwatqanliqini chüshinip yetkenlikini, amérika meblighining xitay armiyesini qollaydighan shirketlerge éqishining aldini élishning eng yaxshi usuli heqqide ünümlük söhbetlerning boluwatqanliqini éytqan.

Mayk jonson bu sözide soda sahesidikilerni xitayning teywen'ge hujum qilish éhtimalliqigha teyyarliq körüsh heqqide agahlandurup: “Biz öz niyitini ashkarilighan bir gumanxor rehber bilen hepilishiwatimiz. Gerche biz bu urushning yüz bermesliki üchün du'a qilsaqmu, biraq öz shirketlirimizning bu éhtimalliqqa teyyarliq qilish üchün qedem bésishigha kapaletlik qilish hemmimizning menpe'etige uyghun” dégen.