Xotendiki "Teyda hessidarliq shirkiti" ning mehsulatliri amérikada resmiy cheklendi

Muxbirimiz irade
2019-10-03
Élxet
Pikir
Share
Print

Tramp hökümiti xitay qatarliq döletlerde mejburiy emgek netijiside ishlep chiqirilghan mallarning amérikagha import qilinishini toxtatti.

Amérika birleshme agéntliqining xewirige qarighanda, seyshenbe küni bu qararning élan qilinishi bilen teng amérikaning herqaysi port we chégra bashqurush da'iriliri xitay, biraziliye, malaysiya we kon'go qatarliq döletlerdin kirgen kiyim-kéchek, altun, bérilyant we bashqa import mallarni tutup qélip, tekshürüsh bashlighan.

Jaza tedbiri qoyulghan shirketlerning biri xotendiki "Teyda hessidarliq cheklik shirkiti" bolup, uning lagérlarda tutup turuluwatqan tutqunlarni mejburiy emgekke sélish bedilige qurulghan shirket ikenliki bu yilning béshida "Nyu-york waqti géziti" qatarliq chong gézitler teripidin ashkarilan'ghan idi. Shu qétimliq weqede teyda shirkiti bilen hemkarliship, uning mallirini amérikigha import qilghan "Bajir" namliq tenterbiye kiyimliri shirkiti küchlük eyibleshlerge duch kelgen. Buning bilen shirket derhal bayanat bérip, xoten teyda shirkiti bilen alaqisini üzgenlikini jakarlighan idi.

Amérika chégra xewpsizliki we mudapi'e da'iriliri bu heqtiki bayanatida yuqiriqi jaza tedbirliri qoyulghan shérketler eger amérikagha qayta mal ékisport qilimen dése, u halda mehsulatlirida mejburiy emgek ishlitilmigenlikini ispatlaydighan matériyallarni teminlishi kéreklikini bildürgen.

Xewerde éytilishiche, mezkur qarar amérika-xitay arisidiki soda urushining bir netijisi bolup, uningdiki meqset xitaygha mejburiy emgekni emeldin qaldurush heqqide signal bérish iken. Uyghur élidiki lagérlarda mejburiy emgekning yolgha qoyuluwatqanliqi amérika hökümet rehberliri we shundaqla herqaysi kishilik hoquq organlirining qattiq diqqitini qozghighan bir mesilige aylan'ghan idi.

Toluq bet