Хитай һөкүмитиниң уйғурларни мәҗбурий әмгәккә салидиған түрләрни көпәйтиватқанлиқи ашкариланмақта

Хитайниң “тәңритағ тори” тарқатқан бир хәвәрдин қариғанда, уйғур районлуқ даириләр бу йилдин башлап районда “үч йил ичидә 375 миң қурулуш устисини тәрбийәләшни, қурулуш саһәсидә 300 миң йеңи хизмәтни қолға кәлтүрүшни вә йәрликтә 1000 қурулуш ширкитини йетиштүрүшни” пиланлимақтикән.

Диққәт қозғайдиғини, хәвәрдә бу қурулуш ишчилиққа тәрбийәлинидиған кишиләрниң алди билән райондики “кәспий маһарәт билән тәрбийәләш мәркәзлирини пүттүргәнләрни, шәһәр – йезилардики ешинча әмгәк күчлири вә 80- 90- йиллардин кейин туғулғанлардин қобул қилинидиғанлиқи” әскәртилгән.

Бу һәқтә ечилған мәхсус йиғинда мундақ дийилгән: “узундин буян, шинҗаңдики қурулуш гуруппилири асаслиқ башқа өлкиләрдики ишчиларға таянған иди. Һазир шинҗаңдики қурулуш ишчилири қерилишиш вә маһарәтлик әмгәк күчи кәмчил болуш қатарлиқ мәсилиләргә дуч кәлмәктә. ‛14-бәш йиллиқ пилан‚ мәзгилидә, шинҗаңниң қатнаш, су теҗәш, енергийә вә ул әслиһә қурулуши қатарлиқ асаслиқ түрләрниң ешишида қурулуш ишчилириға, болупму санаәт ишчилириға болған еһтияҗи зор дәриҗидә ашиду”.

Даириләр бу мәсилини һәл қилиш үчүн “шинҗаңниң өзиниң қурулуш кәспи қошуни қуруп, шәһәр-йеза әмгәк күчлириниң қурулуш кәспидә муқим ишқа орунлишишини илгири сүрүш” лазимлиқини тәкитлигән. Хәвәрдә дейилишичә, даириләр “үч йилда (2023-2025) шинҗаңда 300 миң қурулуш устисини тәрбийәләш вә ишқа орунлаштуруш һәрикәт пилани” ни елан қилған.

Хитай даирилири милюнлиған уйғурларни “кәспий маһарәт билән тәрбийәләш” намида 2017- йилидин башлап лагерларға қамап кәлмәктә. Бундин башқа йәнә ешинча әмгәк күчи намида йүз миңлиған уйғур яшлирини район ичи вә сиртида пахта-тоқумичилиқ, пәмидур, күн тахтиси батарийәси қатарлиқ нурғун саһәдә мәҗбурий әмгәккә селиватқанлиқи мәлум.