Xitay hökümitining Uyghurlarni mejburiy emgekke salidighan türlerni köpeytiwatqanliqi ashkarilanmaqta

Xitayning “Tengritagh tori” tarqatqan bir xewerdin qarighanda, Uyghur rayonluq da'iriler bu yildin bashlap rayonda “Üch yil ichide 375 ming qurulush ustisini terbiyeleshni, qurulush saheside 300 ming yéngi xizmetni qolgha keltürüshni we yerlikte 1000 qurulush shirkitini yétishtürüshni” pilanlimaqtiken.

Diqqet qozghaydighini, xewerde bu qurulush ishchiliqqa terbiyelinidighan kishilerning aldi bilen rayondiki “Kespiy maharet bilen terbiyelesh merkezlirini püttürgenlerni, sheher – yézilardiki éshincha emgek küchliri we 80- 90- yillardin kéyin tughulghanlardin qobul qilinidighanliqi” eskertilgen.

Bu heqte échilghan mexsus yighinda mundaq diyilgen: “Uzundin buyan, shinjangdiki qurulush guruppiliri asasliq bashqa ölkilerdiki ishchilargha tayan'ghan idi. Hazir shinjangdiki qurulush ishchiliri qérilishish we maharetlik emgek küchi kemchil bolush qatarliq mesililerge duch kelmekte. ‛14-besh yilliq pilan‚ mezgilide, shinjangning qatnash, su téjesh, énérgiye we ul eslihe qurulushi qatarliq asasliq türlerning éshishida qurulush ishchilirigha, bolupmu sana'et ishchilirigha bolghan éhtiyaji zor derijide ashidu”.

Da'iriler bu mesilini hel qilish üchün “Shinjangning özining qurulush kespi qoshuni qurup, sheher-yéza emgek küchlirining qurulush kespide muqim ishqa orunlishishini ilgiri sürüsh” lazimliqini tekitligen. Xewerde déyilishiche, da'iriler “Üch yilda (2023-2025) shinjangda 300 ming qurulush ustisini terbiyelesh we ishqa orunlashturush heriket pilani” ni élan qilghan.

Xitay da'iriliri milyunlighan Uyghurlarni “Kespiy maharet bilen terbiyelesh” namida 2017- yilidin bashlap lagérlargha qamap kelmekte. Bundin bashqa yene éshincha emgek küchi namida yüz minglighan Uyghur yashlirini rayon ichi we sirtida paxta-toqumichiliq, pemidur, kün taxtisi batariyesi qatarliq nurghun sahede mejburiy emgekke séliwatqanliqi melum.