Target Вә Cotton On уйғур елидики завутлардин пахта мәһсулатлири киргүзүшни тохтатқан

Мухбиримиз ирадә
2019-10-17
Елхәт
Пикир
Share
Принт

«Күндилик мәктублар-австралийә» гезитиниң хәвәр қилишичә, австралийәдики Target вә Cotton On тавар шеркәтлири уйғур елидики лагер тутқунлири мәҗбурий әмгәккә селиниватқан завутлардин пахта мәһсулатлири киргүзүшни тохтатқан.

Хәвәрдә ейтилишичә, Cotton On шеркити әслидә уйғур елидики «литәй» тоқумичилиқ гуруһиниң мәһсулатлирини киргүзүп кәлгән болуп, «литәй» тоқумичилиқ завути уйғур елидики лагерлардин бириниң йениға қурулған икән. Cotton On Бу һәқтики баянатида өзлириниң әхлақий принсиплириға асасән юқириқи шеркәт билән алақисини үзгәнликини билдүргән. 

Австралийәдики Target шеркитиму 17-сентәбир күнидики баянатида өзлириниң әсли «хуафу» дәйдиған бир шеркәттин мал тәминләп кәлгәнлики, у завутни тәкшүрүш үчүн мәхсус адәм әвәткәндин кейин хуафу шеркити билән болған алақисини кесишни қарар қилғанлиқини ашкарилиған. 

Йеқиндин буян уйғур елидики лагер тутқунлириниң лагерларниң йениға яки йеқин җайларға қурулған завутларда мәҗбурий әмгәккә селиниватқанлиқи һәққидә көпләп учурлар ашкарилинип, америкада күчлүк диққәт қозғашқа башлиған. Нәтиҗидә америка таможна вә чегра қоғдаш идариси хотәндики лагер тутқунлирини мәҗбурий әмгәккә селиватқанлиқи ашкариланған «тәйда кийим-кечәк һәссидарлиқ чәклик ширкити» ишләпчиқарған мәһсулатларниң америка чеграсидин киришини чәкләп, шеркәтниң маллирини чеграда тутуп қалған иди. 

Юқириқи Target вә Cotton On шеркәтлириниң бу қарари уйғурларниң нөвәттики вәзийитини көзитип келиватқан тәтқиқатчилар вә кишилик һоқуқ паалийәтчилириниң алқишиға еришти. Улар буниң башқа шеркәтләр үчүн яхши өрнәк болғанлиқини қәйт қилмақта.

Пикирләр (0)
Share
Толуқ бәт