Target We Cotton On Uyghur élidiki zawutlardin paxta mehsulatliri kirgüzüshni toxtatqan

Muxbirimiz irade
2019-10-17
Élxet
Pikir
Share
Print

"Kündilik mektublar-awstraliye" gézitining xewer qilishiche, awstraliyediki Target we Cotton On tawar shérketliri Uyghur élidiki lagér tutqunliri mejburiy emgekke séliniwatqan zawutlardin paxta mehsulatliri kirgüzüshni toxtatqan.

Xewerde éytilishiche, Cotton On shérkiti eslide Uyghur élidiki "Litey" toqumichiliq guruhining mehsulatlirini kirgüzüp kelgen bolup, "Litey" toqumichiliq zawuti Uyghur élidiki lagérlardin birining yénigha qurulghan iken. Cotton On Bu heqtiki bayanatida özlirining exlaqiy prinsiplirigha asasen yuqiriqi shérket bilen alaqisini üzgenlikini bildürgen. 

Awstraliyediki Target shérkitimu 17-séntebir künidiki bayanatida özlirining esli "Xu'afu" deydighan bir shérkettin mal teminlep kelgenliki, u zawutni tekshürüsh üchün mexsus adem ewetkendin kéyin xu'afu shérkiti bilen bolghan alaqisini késishni qarar qilghanliqini ashkarilighan. 

Yéqindin buyan Uyghur élidiki lagér tutqunlirining lagérlarning yénigha yaki yéqin jaylargha qurulghan zawutlarda mejburiy emgekke séliniwatqanliqi heqqide köplep uchurlar ashkarilinip, amérikada küchlük diqqet qozghashqa bashlighan. Netijide amérika tamozhna we chégra qoghdash idarisi xotendiki lagér tutqunlirini mejburiy emgekke séliwatqanliqi ashkarilan'ghan "Teyda kiyim-kéchek hessidarliq cheklik shirkiti" ishlepchiqarghan mehsulatlarning amérika chégrasidin kirishini cheklep, shérketning mallirini chégrada tutup qalghan idi. 

Yuqiriqi Target we Cotton On shérketlirining bu qarari Uyghurlarning nöwettiki weziyitini közitip kéliwatqan tetqiqatchilar we kishilik hoquq pa'aliyetchilirining alqishigha érishti. Ular buning bashqa shérketler üchün yaxshi örnek bolghanliqini qeyt qilmaqta.

Toluq bet