Хәтәр астидики алимлар тәшкилати хитайни илмий тәтқиқат әркинликигә һөрмәт қилишқа чақирди

Мухбиримиз ирадә
2021-05-06
Share

Хәлқара хәтәр астидики алимлар тәшкилати 4-май күни баянат елан қилип, хитай һөкүмитиниң йеқинда явропа вә америкадики бир қисим тәтқиқатчилар вә тәтқиқат органлириға җаза тәдбири қойғанлиқини тәнқид қилди. Улар хитайниң бу һәрикитини илим-пән әркинликигә қилинған еғир тәһдит, дәп көрсәтти вә хитайни очуқ вә әркин илмий тәтқиқатларға һөрмәт қилишқа чақирди.

Бу йил 3-айда америка, канада, әнгилийә вә явропа иттипақиниң әза дөләтлири болуп, җәмий 33 дөләт хитайниң уйғурларға йүргүзүватқан ирқий қирғинчилиқини әйибләп, бу қирғинчилиқта мәсулийити бар дәп қаралған бир қисим хитай әмәлдарлири вә органлириға җаза тәдбири қойған иди. Буниң билән хитай һөкүмитиму қарши һәрикәткә өтүп, 22-вә 26-март күнлири шивитсийә хәлқара ишлар тәтқиқат орни хитай ишлири мәркизиниң мудири бҗорн җерден, әнгилийә нею-касел университетиниң тәтқиқатчиси җоанне симис финлей вә америкадики тәтқиқатчи адриян зенз қатарлиқ тәтқиқатчиларға вә германийә меркатор тәтқиқат орниға җаза тәдбири қойған иди.

Хәтәр астидики алимлар тәшкилати баянатида хитайниң бу һәрикитини әйибләп: "хитай һөкүмити дәлил-испат билән, санлиқ мәлуматлар билән уларниң тәтқиқатлириға рәддийә бериш орниға, тәтқиқатчиларға саяһәт чәклимиси вә хитайдики тәтқиқатчилар билән һәмкарлишиш чәклимиси қойди. Бу җаза илмий атмосферани җимиқтуруш вә хитай компартийәси-дөлити тәрипидин тәстиқланған баян яки идеологийигә мас кәлмәйдиған тәтқиқат билән шуғуллинидиған һәр қандақ алим яки органни қорқутуш урунушидур. Бу әркинликкә еғир тәһдит болуп, чоқум қарши турулуши керәк," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт