Tetqiqatchi elén méndoza: "En'gliye amérika bilen bir septe turup xitaygha taqabil turushi kérek"

Muxbirimiz irade
2019-08-08
Élxet
Pikir
Share
Print

En'giliyede chiqidighan "Quyash géziti" de 7-awghust küni "Biz ittipaqdishimiz amérika bilen birliship xitaygha qarshi büyük urushqa qatnishishimiz yaki zor siyasiy xataliqqa tewekkül qilishimiz kérek" mawzuluq bir parche maqale élan qilindi.

Maqale en'gliye "Hénriy jékson ijtima'iy tetqiqat orgini" ning qurghuchisi, tetqiqatchi elén méndoza teripidin yézilghan bolup, u maqaliside "En'giliyening tarixtin sawaq élip, amérika bilen bir septe turup, xitaygha taqabil turushi we bu arqiliq xitayni xelq'araliq normilar boyiche ish qilishqa köndürüshi kérekliki" dek bir idiyeni algha sürgen.

U xitayning en'giliyege séliwatqan mebleghliri en'gliye iqtisadigha belgilik payda ekelgen bolsimu, hemme nersining körün'gendek güzel emeslikini, jümlidin xitayning déktator bir hakimiyet ikenlikini, öz puqralirining kishilik hoquqini qattiq depsende qiliwatqanliqini, buning eng tipik örnikining nöwette bir milyondin oshuq Uyghur musulmanlirining lagérlarda tutup turulushi ikenlikidek misallarni bayan qilip ötken. U yene xitay hökümitining xongkongdimu öz néqabini yirtip tashlap, heqiqiy yüzini ashkarilawatqanliqini bildürgen.

Aptor maqaliside xitay hökümitining bundaq qanunsiz heriketlirining dölet ichidila emes, belki dölet sirtidimu mewjut ikenliki, mesilen, uning jenubiy déngizdiki arallarni özining qiliwélip, u arallarni qorallanduruwatqanliqi, iran we shimaliy koréye bilen soda qilip, ularning yadro sinaqliri üchün yardemliship, gherb döletlirige paydisiz bir muhit yaritiwatqanliqi, xitayning mebleghlirini alghan sirilanka qatarliq döletlerning aqiwette xitaygha yölinip qalghanliqidek pakitlarnimu otturigha qoyghan.

Elén méndoza mulahiziside amérika xitayni resmiy halda "Pulning almashturulush qimmitini kontrol qilidighan dölet" dep qara tizimlikke alghan mushu peytlerde en'giliyeningmu tallashqa duch kelgenlikini eskertken we "Biz xitayning yuqiriqidek qobul qilghusiz yüksilishige köz yumup, xitay pulining dawamliq yanchuqimizgha kirishini dawamlashturamduq yaki amérika bilen birlikte adil riqabetni qoghdamduq? elwette, héchkim soda urushi qilip ziyan tartishni xalimaydu. Emma bu xitayni xelq'ara qanunlargha köndürüsh üchün tölinishke tégishlik bir bedel bolsa, u halda men buni töleshke erziydighan bir bedel dep qaraymen," dégen.

Toluq bet