Имрул ислам: «хитай милләтчилики уйғурларни вәйран қилиш бәдилигә йүксәлмәктә!»

Мухбиримиз әзиз
2019-05-07
Елхәт
Пикир
Share
Принт

Уйғурлар дияридики сиясий бастуруш вә зор тутқун хәлқара ахбарат васитилиридә көп қетим тилға елиниватқан болсиму, буниңда хитай милләтчилики идийәсиниң қандақ рол ойнаватқанлиқи көпинчә һалда кишиләрниң диққитидин халий қеливатқанлиқи мәлум. Җорҗ тавн университетиниң мутәхәссислиридин имрул ислам бу һәқтики әһвалларни омумлаштуруп, хитайдики милләтчилик идийәсиниң әмәлийәттә уйғурларни вәйран қилиш бәдилигә баш көтүрүватқанлиқини алаһидә тәкитләйду.

3-Май күни җорҗ тавн университети қармиқидики «көврүк қурулуши» ниң тор бетидә елан қилинған бу һәқтики мақалида хитай милләтчилики вә униң уйғур җәмийитигә қандақ сәлбий тәсир елип келиши «милләтчиликниң бурмилиниши» дәп көрситилиду.

Апторниң қаришичә, милләтчилик идийәси адәттә бирәр дөләт бир зор тәһдиткә дуч кәлгәндә бу тәһдитни дүшмәнлик дәриҗисигә көтүрүш арқилиқ ипадилиниду. Бүгүнки дуняда бирмаға охшаш бир қисим дөләтләр ислам динини өзлири үчүн зор тәһдит, дәп қариғанлиқтин уларниң буниңға қарши болған милләтчилик идийәси баш көтүргән. Хитайда болса ислам дини хитай һөкүмитиниң «хитайлаштуруш» қурулушиға тосқунлуқ қилғучи амил болғанлиқтин, милләтчиликниң һуҗум нишани болуп қалған.

Мақалида көрситилишичә, 1990-йилларда уйғурлар хитайларни мәркәз қилиш идийәсигә хирис қилғучилар сүпитидә бастурулған болса, 2000-йиллардин кейин хәлқарадики «террорлуққа қарши туруш» долқунида йәнә бир қетим қаттиқ бастурулған. 2016-Йилидин кейин болса «ислам вәһимиси» ни мәнбә қилған хитай милләтчилики уйғурлардики ислам диниға һуҗум башлиған һәмдә һазирқидәк үч милйон уйғурниң лагерларға бәнд болушиға сәвәб болған.

Пикирләр (0)
Share
Толуқ бәт