Shi'endiki bir kent bashliqi saylimida xelq kompartiye üstidin ghelibe qildi

Shi'en shehirining chang'en rayoni gu'angdung kentide tünügün ötküzülgen kent bashliqi saylimida, höküm teripidin körsitilgen namzat üstidin xelq körsetken namzat ghelibe qilghan.

Saylamda hökümet teripidin körsitilgen namzat li yichün 147 awazgha, xelq teripidin körsitilgen namzat shyé li 842 awazgha érishken. Saylam netijisini körgen kent ahaliliri neq meydanda hayajinini basalmay köz yéshi qilishqan we kéchiche étildaq étip ghelibe tentenisi qilishqan.

Radi'omiz xitayche bölümining bu heqtiki xewiride bayan qilishiche, mezkur kentning rehberliri ilgiri, kenttiki kolléktipqa a'it yerlerni ammining raziliqisiz, shirketlerge sétiwetken. Yene köpligen kent ahalilirining kentte élip bérilghan asasi qurulushlar sewebidin öyliri mejburiy chéqiwétilgen. Kent ahalilirining yérimi dégüdek öyidin ayrilghandin kéyin, ahaliler hökümetke kolléktip naraziliq bildürüp, kent bashliqini qaytidin saylashni telep qilghan.

Netijide hökümet terep, kent yerlirini sétiwetken sabiq kent bashliqini qayta namzat qilip körsetken؛ emma saylamda ahaliler özliri kélishken namzatqa awaz bérip, mutleq üstünlük bilen saylamda ghelibe qilghan. Bu xitayda, xitay kompartiyisining iradisige xilap halda netije bergen we xelq'ara jama'etning diqqitini tartqan ikkinchi qétimliq kent saylimi bolup hésablinidu؛ tunji qétimliqi bultur gu'angdungning wüken kentide yüz bergen.