Xelq'ara kechürüm teshkilati xitaydin "Nazaretchilik qanuni" layihisini bikar qilishni telep qildi

Muxbirimiz irade
2017-12-08
Élxet
Pikir
Share
Print

Xelq'ara kechürüm teshkilati xitay yéqinda élan qilghan "Nazaretchilik qanuni" layihisi heqqide mexsus bir parche doklat élan qildi. Aldinqi küni élan qilin'ghan doklattin melum bolushiche, "Nazaretchilik qanuni" layihisi xitay jama'et xewpsizlik organlirining qolgha élish, tutup turush ishlirigha munasiwetlik iken. Uningdiki maddilar xitaydiki jama'et xewpsizlik tarmaqlirining hoquq da'irisini yenimu kéngeytip, xitaydiki öz meyliche tutqun qilish, muddetsiz tutqun qilish qilmishlirining yenimu éghirlishishini keltürüp chiqiridiken.

Xelq'ara kechürüm teshkilati bu "Qanun layihisini" xitay özi qol qoyghan "Kishilik hoquq xitabnamisi" we bashqa alaqidar qanunlargha xilap, dep körsetken. 

Uningda bayan qilinishiche, xitay qol qoyghan xelq'ara qanunlar boyiche, eger bir kishi tutqun qilin'ghan teqdirde u kishi we uning yéqin a'ile-tawabatliri tutqunning tutulush sewebi, mudditi, tutup turuluwatqan ornidin toluq xewerdar bolush hoquqigha ige, dep békitilgen bolsimu, emma xitay élan qilghan bu yéngi "Qanun layihisi" de bu maddilar qattiq depsende qilin'ghan iken. 

Xelq'ara kechürüm teshkilati doklatida xitay hökümitidin mezkur layihini derhal bikar qilishni telep qilghan. 

Chet'ellerdiki Uyghur közetküchiler, yuqiridiki "Qanun layihisi" ning Uyghurlargha biwasite munasiwetlik ikenlikini, eger bu maqullan'ghan teqdirde buning Uyghur élida dawam qiliwatqan "Xalighanche tutqun qilish" "Xalighanche muddette tutup turush" qilmishlirini qanuniy asasqa ige qilidighanliqini bildürdi. Ular, nöwette Uyghur élida qurulghan "Yépiq terbiyilesh merkezliri" mana bu xil "Öz meyliche tutqun qilish" ning eng yarqin örniki, dep körsetti.

Toluq bet