Xitayda yolgha qoyulghan nérwa késellikliri doxturxanisigha mejburiy apiriwétishni chekleydighan qanunda gumanliq noqtilarning köpliki bildürülmekte

Xitayda charshenbe künidin itibaren kishilerni özining raziliqi bolmay turup nérwa késellikler doxturxanisigha apiriwétishni chekleydighan yéngi qanun maddisi yolgha qoyulghan. Xitay merkizi téléwiziye qanili bügün bu heqte élan qilghan xewiride, mezkur qanunning mejburiy qolgha élish ehwalini cheklesh üchün yolgha qoyulghanliqini alahide eskertken.

Fransiye agéntliqining éytishiche, bu qanun téxi yéqindila kishilik hoquq organliri xitay hökümitini eyiblep, xitayda her yili yüzlerche, minglarche kishilik hoquq aktipi we öktichilerning mejburiy halda nérwa késellikler doxturxanisigha solinip jazalinidighanliqini otturigha qoyghandin kéyin élan qilin'ghan bolup, xitayda bu xil qanunning tunji qétim yolgha qoyulushi bolup hésablinidiken.

Emma xewerde éytilishiche, qanunda otturigha qoyulghan bezi maddilarda gumanliq noqtilar yenila köp iken. Chünki qanunda hemme kishining öz raziliqi élinishi kérek déyilgen bolsimu, uninggha yene “Bu késili éghir bolghan, özige we bashqilargha ziyan bérish éhtimali bolghan kishilerni öz ichige almaydu” dep qoshumche qilin'ghan.

Shangxey nérwa késellikler merkizining doxturi jang shinkey muxbirgha qilghan sözide, “Qanunda qandaq kishilerning nérwa késili yaki yuqiridikidek özige we bashqilargha ziyan béridighan kishi dep békitilidighanliqigha yenila éniq tebir bérilmigen” dégen.