Xitay hökümiti emdiki hujum nishanini Uyghurlarni téma qilghan chet'el "Medeniyet mehsulatlirigha" qaratqan

Muxbirimiz erkin
2021-08-02
Share

Uyghurlar mesiliside gherb taratqulirini, gherbning hökümet we siyasiyonlirini eyiblep kelgen xitay hökümiti, emdi hujum nishanini gherb "Medeniyet mehsulatliri" gha qaratqan. Uning ilgiri sürüshiche, bu xil "Medeniyet mehsulatliri pütünley toqup chiqirilghan exlet" bolup, "Shinjangning obrazi" gha dexli yetküzelmeydiken. Bu sözlerni Uyghur aptonom rayonluq hökümetning bayanatchisi shu guyshyang 30-iyul béyjingda chaqirilghan axbarat yighinida qilghan.

Bu, Uyghur aptonom rayonluq hökümetning bezi gherb döletliri teripidin "Irqiy qirghinchiliq" dep eyiblinip kelgen "Shinjang siyasiti" ni aqlash ‍üchün ötküzgen 50 nechchinchi qétimliq axbarat yighini idi. "Xitay xewerliri" torining bildürüshiche, shu guyshyang "Shinjangdiki her millet ammisining bext izdesh tirishchanliqigha birqanche karton qara sürtelmeydighanliqi" ni ilgiri sürgen.

U Uyghurlar mesilisini küntertipke keltürgen gherb tetqiqatchiliri, taratquliri, tetqiqat orunliri we ammiwi teshkilatlirini "Medeniyet bayriqi" kötürüwalghan gherb düshmen küchlirining "Shinjanggha hujum qilish awan'gartliri" dep eyibligen.

Yighinda Uyghur aptonom rayonluq hökümetning yene bir bayanatchisi élijan inayet "Qaraqarsh höjjetliri" ni inkar qilghan. Uning éytishiche, "Qaraqash höjjetliri" diki 311 kishining mutleq köp qismi "Jem'iyette normal yashawatqan kishiler" iken. Biraq u höjjettiki qalghan kishilerning aqiwitini tilgha almighan. "Qaraqash höjjetliri" xoten shehirining bostan ahaliler rayonidiki 611 din artuq a'ilige chétishliq 3 mingdek kishining arxipi bolup, bu höjjet Uyghurlarning qandaq bahane-sewebler bilen tutqun qilin'ghanliqini küchlük deliller bilen teminligenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet