Gérmaniye iqtisad ministiri béyjingda xitay öktichilerni qobul qilghan

Gérmaniye iqtisad ministiri sigmar gabril charshenbe küni béyjingdiki gérman elchixanisida bir türküm xitay öktichilerni qobul qilghan.

Roytirisning bu heqtiki xewiride bayan qilinishiche, bu öktichiler arisida saxarof mukapati sahibi xujya, tor yazghu'ichisi mu rungshüé qatarliqlar bar bolup, ministir bularni “Xitay dölet apparatining awarigerchilikini bashtin kechürgenler” dep teripligen. Melum bolushiche, körüshken öktichilerning arisida türmidiki bir adwokatning ayali bar bolup, u xitay dölet erbabliri bilen bu qétim élip bérilidighan uchrishishlirida türmidiki adwokatlarni qoyuwétishni ashkara otturigha qoyidighanliqini we yazma shekilde élan qilidighanliqini éytqan.

Xewerlerde déyilishiche, xitayda kishilik hoquq mesilisi shi jinping dewride téximu sezgür bir témigha aylan'ghan, ijtima'iy pa'aliyetlerge qarita kontrolluq we siyasiy öktichilerge qarita tazilash heriketliri yéqinqi 10 yil ichidiki yuqiri pellige yetken.

Melum bolushiche, gérman ministir yolgha chiqishning aldida dunya Uyghur qurultiyi bash katipi dolqun eysa mezkur ministirliqtiki xadimlar bilen körüshüp nöwettiki Uyghur weziyiti heqqide melumat bergen idi.