Xitayning qishliq olimpik yighinini bayqut qilish chaqiriqi barghanséri kücheymekte

Xitay hökümitining 2022-ylidiki qishliq olimpik yighinigha sahibxanliq qilishini cheklesh chuqanliri yéqindin buyan barghanséri yuqiri pellige kötürülüshke bashlidi. Beziler bu halni 2008-yilidiki béyjing olimpik yighinigha qarshi turushtinmu éghir bolghan qarshiliqlargha duch kelmekte, dep qarimaqtiken.

“Iqtisadshunas” gézitining 8-noyabirdiki maqalisida éytili'ishche, nöwette awstraliye, en'gliye, amérika qatarliq ellerdiki yuquri derijilik hökümet emeldarliri, jümlidin en'glyening tashqi ishlar weziri dominik rab qatarliqlar buningda aktip pa'aliyetlerde bolmaqtiken. Ular xitay hökümitining Uyghurlarni lagérlargha qamash hemde ulargha qarita mejburiy tughmas qiliwétish, mejburiy emgek qatarliq qilmishlirini eyiblep “Mushundaq qebih qilmishlar bilen shughulliniwatqan bir döletning olimpik musabiqisi ötküzmekchi bolushi olimpik yighinining héchqandaq rohigha uyghun emes” dep körsetken. Shundaqla natsistlar gérmaniyesiningmu 1936-yili bérlinda adolf gitlérning obrazini gewdilendürüsh üchün ashu xildiki musabiqige sahibxan bolghanliqini eskertken.

Maqalida alahide tekitlen'gen yene bir nuqta, bu xildiki chong musabiqilarni iqtisadiy jehettin qollaydighan shirketler bolup, nöwette bu xildiki chong shirketlerning köpinchisi biwaste yaki wastilik halda Uyghurlar diyaridiki mejburiy emgek bilen chétishliq iken. Yene kélip eyni waqitta 2022-yilidiki qishliq olimpik yighinigha sahibxan chaqirish yighinigha xitay bilen qazaqistanla qatnashqan bolup, olimpik komitétining bundaq bir tallash hoquqini xitaygha bérishi eyni waqittila toghra bolmighan bir qarar, dep qaralghaniken.