Ichkiridin yurtigha qaytqan Uyghurlarni kütüwatqan lagérlar

Uyghur diyaridiki siyasiy basturushning shamili ichkiride her xil kesipler bilen shughulliniwatqan Uyghurlarnimu bosh qoymaywatqanliqi yéqinda bir qisim Uyghurlarning aghzaki bayanliridin melum boldi.

“Zimistan” torining 15-öktebirdiki xewiride éytilishiche, yé ling texellusidiki xitay aptor xitayning fujyen ölkiside baqqalliq qiliwatqan baqi isimlik bir Uyghur bilen sözleshken. Baqi uninggha yurtidiki ahaliler komitéti özige “Tézdin qaytip kélip kimlikni yenggüshliwélish” ni éytqanliqini, emma özining yurtigha ottek qaytqusi bolsimu qaytishqa jür'et qilalmaywatqanliqini éytqan. Muxbir buning sewebini sorighanda u “Ichkiridin qaytip barghan Uyghurning hemmisi lagérgha kétiwatidu. Barsam emdi qaytip kélelmeslikim éniq” dégen.

Baqi uninggha özi tonuydighan kishilerdinla nechchisining yurtigha qaytqan haman lagérgha élip kétilgenlikini, ulardin bezilirining 15-20 yildin qamaqqa höküm qilin'ghanliqini, hazir yéshi 40 qa barmighanliki erlerning “Terbiyelesh” ke élip kétiliwatqanliqini sözlep bergen. Ichkiridiki bir réstoranda ishlewatqan rena isimlik Uyghur ayalmu érining ikki yil burun yurtidin kelgen bir téléfon bilen qaytip barghanche lagérgha qamalghanliqini, érining ortaq til we fujyen shéwiside rawan sözliyeleydighanliqini, shundaq turuqluq hazirghiche “Terbiyelesh” tin chiqalmighanliqini éytip bergen.