Xitay ottura asiya jumhuriyetliridin ashliq we kömür import qilishni kücheytken

Xitay rehbiri shi jinping 18-may ottura asiya jumhuriyetlirining rehberliri bilen xitayning shi'en shehiride uchriship, xitayning ottura asiya jumhuriyetliri bilen bolghan soda we ul esliheler tereqqiyat istratégiyesini élan qilish bilen bir waqitta, xitay bu jumhuriyetlerdin ashliq we kömür import qilishini kücheytken. “Tengri tagh” torining xewer qilishiche, xitayning bu yilning deslepki 4 éyida Uyghur éli arqiliq import qilghan ashliq miqdari ötken yilning oxshash mezgilidikidin 146.7 Pirsent ashqan. Xewerde, 4 ay ichide import qilin'ghan 293 ming tonna ashliqning 90 pirsentining ottura asiya jumhuriyetliridin, bolupmu qazaqistandin import qilin'ghanliqini bildürgen.

Lékin “Shinjang géziti” ning ashkarilishiche, xitay ottura asiya jumhuriyetliridin ashliq import qilishni köpeytken bolsimu, emma xitayning Uyghur élidin bu jumhuriyetlerge éksport qilghan mehsulatliridimu zor artish barliqqa kelgen. Bu yilning deslepki töt éyida Uyghur élining ottura asiyadiki 5 jumhuriyetke éksport qilghan mehsulati, xitayning memliket boyiche bu jumhuriyetlerge éksport qilghan mehsulatlirining 43 pirsentini teshkil qilghan.

Uyghur élining ottura asiyadiki bu türkiy jumhuriyetlerge qaratqan éksportidiki artishi, amérika bashchiliqidiki gherb elliri Uyghur élida ishlepchiqirilghan mejburiy emgek mehsulatlirigha cheklime qoyushidin kéyin barliqqa kelgen. Amérika “Uyghur mejburiy emgikining aldini élish qanuni” maqullap, bu xil mehsulatlarni chekligen. Bu ehwalda xitayning Uyghur mejburiy emgek mehsulatlirini éksport qilish nishani “Bir belbagh bir yol” liniyesidiki döletlerge yötkelgen.

Oxshash bir waqitta xitay yene qirghizistandin kömür import qilishqa bashlighan. “Xitay xewerliri agéntliqi” ning éytishiche, 21-may küni kömür bésilghan 6 yük aptomobili qirghizistanning osh shehiridin erkeshtam arqiliq qeshqer shehirige kömür yötkeshke bashlighan. Xewerde, bu 6 yük aptomobilining 154.69 Tonna kömürni qeshqerge toshup kelgenliki, osh kömür import yolining resmiy échilghanliqi bildürülgen.