Pakistan hökümiti “Xitay-pakistan iqtisadi karidori” ni tirildürüshke aldirimaqta
2024.06.05
Pakistandiki “Shepeq” gézitining 3-iyundiki obzor maqaliside körsitilishiche, qeshqerdin pakistandiki gwadar portigha qeder sozulidighan “Xitay-pakistan iqtisadi karidori” qurulushi yéqinqi yillarda mebleghning toxtap qélishi tüpeylidin sugha chiliship qélishqa yüzlen'gen. Pakistan bash ministiri shahbaz sherif (Shehbaz Sharif) ning xitay ziyariti mezgilide bu qurulushning qaytidin rawaj tépishigha yol tépish heqqidiki ümidler herqaysi axbaratlardin keng yer alghan.
Xewerde éytilishiche, 2024-yili may éyida mu'awin bash ministir is'haq dar (Ishaq Dar) béyjinggha ziyaretke barghanda ikki terep söhbitidiki merkiziy téma mezkur qurulushni qandaq qilghanda qaytidin janlandurush mesilisi bolghan. Bolupmu meblegh mesilisidiki kemchillik, xitay ishchiliri duch kéliwatqan térrorluq hujumliri qatarliq amillar tüpeylidin köpligen türler bir izda toxtap qalghan. Shu qétimliq ziyarettin kéyin is'haq dar bu heqte söz qilip “Biz bu mesilide arzu qilghan nishanlirimizning köp qismigha yettuq” dégen.
2015-Yili bashlan'ghan hemde 62 milyard amérika dolliri meblegh sélish pilanlan'ghan “Xitay-pakistan iqtisadi karidori” duch kéliwatqan eng zor qiyinchiliqlardin biri bixeterlik amili bolup, bash ministir shahbaz sherifning bu qétimqi béyjing sepiride mushu mesilini muzakire qilish mumkinliki algha sürülmekte. Yene kélip bu qurulushning dawam qilish-qilmasliqi pakistanning toxtap qéliwatqan iqtisadi üchün hel qilghuch rol oynaydighan bolghachqa bu heqte xitay axbaratining ziyaritini qobul qilghanda shahbaz sherif özining bu qétimqi sepiride “Nurghunlighan katta pilanlarning barliqini, bu pilanlarning ikki terep otturisidiki dostluqni himalaya téghidinmu büyük, okyandinmu chongqur qilish rolini oynaydighanliqini” tekitligen.
Emma “El jezire” ning 3-iyundiki mulahize maqaliside körsitilishiche, shahbaz sherifning qandaq teswirlishidin qet'iynezer “Xitay-pakistan iqtisadi karidori” xitay nöwette zor küch bilen ijra qiliwatqan “Bir belbagh bir yol qurulushi” ning achquchluq qismi hésablinidu. U namda her xil yollar, köwrükler we portlar arqiliq qedimki yipek yolini qaytidin janlanduridu, déyilsimu emeliyette xitayning öz tesirini dunyagha kéngeytish urunushining parawuzi bolup, pakistan'gha oxshash namrat döletlerni téximu köp qerz patqiqigha paturushni közleydiken.