Xitay hökümiti pay chéki bazirini qoghdap qélish üchün 278 milyard dollar ajritidiken

“Blombérg xewerliri” torining 23-yanwar küni xewer qilishiche, xitay hökümiti künséri chöküwatqan pay chéki bazirini qutquzup qélish üchün, 278 milyard dollar serp qilmaqchi bolghan, bu meblegh asasen xitayning dölet igilikidiki karxanilarning chet eldiki tarmaqliridin toplinidiken.

Xitay iqtisadida kirizis körülüwatqan bügünki künde pay chéki bazirini qayta janlandurush xitay hökümitining muhim nishanigha aylan'ghan. Xitay bash ministiri li chyang 22-yanwar küni bildürgen inkasida, xitayning buningdin kéyin kapital bazirigha ottura we uzaq mezgillik meblegh salidighanliqini bildürgen.

Halbuki, chet eldiki kapital bazirining eng chong meblegh salghuchiliridin bolghan morgan stenli (Morgan Stanley) ning bir doklatigha asaslan'ghanda, chet eldiki pul-mu'amile fondliri xitaydiki 1 milyard 600 milyon pay chékini sétiwetken.

Xewerde körsitilishiche, xitay hökümitining pay chéki bazirigha salidighan bu meblighi xitayning nöwettiki omumiy ishlepchiqirish qimmitining 2 pirsentigimu yetmeydighan bolup, pay chéki baziri üchün yenila yéterlik meblegh hésablanmaydiken.

Chet ellik iqtisadshunaslar xitayning iqtisadining hazir turghun weziyettin kirizis dewrige qedem qoyuwatqanliqi heqqide köplep maqalilerni élan qiliwatqan bügünki künde, xitay metbu'atlirida xitayning iqtisadiy asasining yenila küchlük ikenliki, “Bir belbagh bir yol” qurulushining dawam qiliwatqanliqi, Uyghur rayonidin chiqiwatqan énérgiye, ashliq we bashqa mehsulatlarning dawamliq éshiwatqanliqi heqqide teshwiqat élip bérilmaqta.