Уйғур аптоном райони хитайдики пенсийәгә чиққан “пешқәдәм ихтисас игилири” ни җәлп қилиш пилани йолға қойған

2017-Йили башланған чоң тутқунда уйғур ихтисас игилирини тазилап, түрмә, лагерларға қамиған хитай даирилири, нөвәттә хитайдики пенсийәгә чиққан “пешқәдәм ихтисас игилири” ни уйғур елиға җәлп қилишниң пиланини түзүп, рәсмий иҗра қилишқа башлиған.

“шинҗаң гезити” ниң ашкарилишичә, “ақ чачлиқлар пилани” дәп нам берилгән мәзкур пилан “шинҗаңниң ичи вә сиртидики мунәввәр пән-техника пенсийонерлирини техиму җәлп қилиш сәпәрвәрлики қилип, шинҗаңниң пән-техникисида йеңилиқ яритиш ишлириға қатнаштурушни мәқсәт қилған” икән. Хәвәрдә дейилишичә, йеқинда рәсмий йолға қоюлған мәзкур пилан бойичә һәр йили 100 дәк мунәввәр пән-техника саһәсидики пенсийонерларни техника гурупписи қилип тәшкилләп, уларни “илмий тәтқиқат билән шуғуллиниш” шараитиға игә қилидикән. Хәвәрдә йәнә бу арқилиқ “уйғур аптоном райониниң юқири сәвийәлик пән-техника ихтисас игилири йетишмәслик әһвалини һәл қилидиғанлиқи” тәкитләнгән.

Һалбуки, мәзкур пиланниң 2017-йили башланған чоң тутқунда уйғур аптоном райониниң һәр қайси пән-техника, сода-санаәт, маарип, медитсина, канчилиқ, лайиһәләш, әдәбият-сәнәт, иҗтимаий пән тәтқиқат саһәлиридики миңлиған уйғур ихтисас игилири тутқун қилинип, уларниң мутләқ көп қисминиң һазирғичә һечқандақ из-дерики болмиған бир вақитта оттуриға қоюлуши вә иҗра қилиниши, диққәт қозғимақта. Кишилик һоқуқ тәшкилатлириниң қәйт қилишичә, 2017-йили башлинип һазирғичә давамлишиватқан бу тутқун, уйғур дияриниң ихтисас игилири саһәсидә зор бошлуқ шәкилләндүргән икән.

“шинҗаң гезити” ниң хәвиридә, “қиран ихтисас игилири” пиланиниң нефит-тәбиий газ ишләпчиқириши, пишшиқлап ишләш, көмүрчилик, електир вә химийә санаити, йешил канчилиқ, ашлиқ, пахта-тоқумичилиқ, кийим-кечәк, йешил органик бағвәнчилик, көктатчилиқ қатарлиқ истратегийәлик йеңи гүллиниватқан ишләпчиқириш саһәлирини, шуниңдәк әла сүпәтлик чарва мәһсулати, йеңи енергийә, йеңи материяллар, сағламлиқ, екологийәлик муһит, су байлиқи бихәтәрлики, өзәк ишләпчиқириши қатарлиқ саһәләрни асаслиқ таллаш нишани қилидиғанлиқи тәкитләнгән. `