Uyghur aptonom rayoni xitaydiki pénsiyege chiqqan “Péshqedem ixtisas igiliri” ni jelp qilish pilani yolgha qoyghan

2017-Yili bashlan'ghan chong tutqunda Uyghur ixtisas igilirini tazilap, türme, lagérlargha qamighan xitay da'iriliri, nöwette xitaydiki pénsiyege chiqqan “Péshqedem ixtisas igiliri” ni Uyghur éligha jelp qilishning pilanini tüzüp, resmiy ijra qilishqa bashlighan.

“Shinjang géziti” ning ashkarilishiche, “Aq chachliqlar pilani” dep nam bérilgen mezkur pilan “Shinjangning ichi we sirtidiki munewwer pen-téxnika pénsiyonérlirini téximu jelp qilish seperwerliki qilip, shinjangning pen-téxnikisida yéngiliq yaritish ishlirigha qatnashturushni meqset qilghan” iken. Xewerde déyilishiche, yéqinda resmiy yolgha qoyulghan mezkur pilan boyiche her yili 100 dek munewwer pen-téxnika sahesidiki pénsiyonérlarni téxnika guruppisi qilip teshkillep, ularni “Ilmiy tetqiqat bilen shughullinish” shara'itigha ige qilidiken. Xewerde yene bu arqiliq “Uyghur aptonom rayonining yuqiri sewiyelik pen-téxnika ixtisas igiliri yétishmeslik ehwalini hel qilidighanliqi” tekitlen'gen.

Halbuki, mezkur pilanning 2017-yili bashlan'ghan chong tutqunda Uyghur aptonom rayonining her qaysi pen-téxnika, soda-sana'et, ma'arip, méditsina, kanchiliq, layihelesh, edebiyat-sen'et, ijtima'iy pen tetqiqat saheliridiki minglighan Uyghur ixtisas igiliri tutqun qilinip, ularning mutleq köp qismining hazirghiche héchqandaq iz-dériki bolmighan bir waqitta otturigha qoyulushi we ijra qilinishi, diqqet qozghimaqta. Kishilik hoquq teshkilatlirining qeyt qilishiche, 2017-yili bashlinip hazirghiche dawamlishiwatqan bu tutqun, Uyghur diyarining ixtisas igiliri saheside zor boshluq shekillendürgen iken.

“Shinjang géziti” ning xewiride, “Qiran ixtisas igiliri” pilanining néfit-tebi'iy gaz ishlepchiqirishi, pishshiqlap ishlesh, kömürchilik, éléktir we ximiye sana'iti, yéshil kanchiliq, ashliq, paxta-toqumichiliq, kiyim-kéchek, yéshil organik baghwenchilik, köktatchiliq qatarliq istratégiyelik yéngi gülliniwatqan ishlepchiqirish sahelirini, shuningdek ela süpetlik charwa mehsulati, yéngi énérgiye, yéngi matériyallar, saghlamliq, ékologiyelik muhit, su bayliqi bixeterliki, özek ishlepchiqirishi qatarliq sahelerni asasliq tallash nishani qilidighanliqi tekitlen'gen. `