Xitay bayanatchi jaw lijiyen: “Adriyan zénzning qeshqer sotida erz qilinishi xitayning qanun döliti ikenlikini namayan qildi”

Muxbirimiz irade
2021.04.15
Share on WhatsApp
Share on WhatsApp

Xitay tashqi ishlar bayanatchisi jaw lijiyen 14-aprél künidiki axbarat yighinida tetqiqatchi adriyan zénzning Uyghur élidiki paxtilarning mejburiy emgekke chétishliqliqini spatlap chiqqan doklatini inkar qilghan. U adriyan zénzning tetqiqat netijilirini “Mish-mish parang” dep atap “U shinjangning qanunluq tijaret qilidighan karxaniliri we japaliq ishlesh arqiliq namratliqtin qutulghan kishilerning menpe'etige ziyan yetküzdi” dégen.

Yéqinda xitaydiki hökümet taratquliridin “Xitay xewer tori” uchur tarqitip, “2-Aprél küni qeshqer ottura xelq sot mehkimisi yeken nahiyesidiki shiyongying toqumichiliq cheklik shirkitining adriyan zénz üstidin qilghan erzini tapshuruwaldi” dégen.

Xitay tashqi ishlar bayanatchisi jawlijiyen bayanatida “Xitay qanun bilen bashqurulidighan dölet, shinjang aptonom rayonidiki alaqidar shirketler qanun arqiliq adriyan zénzni erz qildi, bu qanun bilen idare qilish we xitay xelqining hoquq-menpe'etini qoghdash éngining kücheygenlikini eks ettürdi. Bu ish kishini tolimu razi qilidu” dégen.

Halbuki, xitayning qanun arqiliq idare qilinidighan döletlikini ilgiri sürgen jawlijiyen axbarat yighinida xitayning asasiy qanunidiki milliy hoquq boyiche “Shinjang Uyghur aptonom rayoni” dep békitilgen resmiy naminimu toluq atimay, uni bashtin axiri “Shinjang aptonom rayoni” dep atap, aptonomiye hoquqi mensup bolghan Uyghur namini qollanmighan.

Adriyan zénz ötken 12-ayda “Yershari siyasiti merkizi” de élan qilghan doklatida, 2018-yili Uyghur élining peqet üch wilayitidila az dégende 570 ming ademning mejburiy paxta térishqa sélin'ghanliqini, paxtigha munasiwetlik herqandaq mehsulat we teminlesh zenjirlirining xam eshyasining mejburiy emgekke chétishliqliqini xitay hökümiti özi élan qilghan höjjetlerge asaslinip turup ashkarilighanidi.

Mezkur doklattin kéyin, amérika hökümiti we “H&M” qatarliq dangliq kiyim markiliri Uyghur élini menbe qilghan paxtilar bilen munasiwitini üzidighanliqini jakarlighan. Xitay bolsa shundin kéyin adriyan zénzni haqaretlesh, Uyghurlarning paxtilarni öz ixtiyarliqi bilen tériwatqanliqi mezmun qilin'ghan teshwiqatlarni tarqitip keldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.