Xitay “Bölgünchilikke qarshi turush qanuni” maqullan'ghanliqining 15 yilliqini xatirilidi

Xitay xelq qurultiyi 29-may küni “Bölgünchilikke qarshi turush qanuni” maqullan'ghanliqining 15 yilliqini xatirilesh pa'aliyiti ötküzüp, bölgünchilikke zerbe béridighanliqining bildürgen. Uning tekitlishiche, “Bir dölette ikkil xil tüzüm döletni birlikke keltürüshning eng nadir yoli” iken. Yighinda xitay xelq qurultiyining mudiri su jenshu nutuq sözligen. Uning tekitlishiche, xitayning “Bölgünchilikke qarshi turush qanuni” xitayning “Tinchliq bilen birlikke kélishini ilgiri sürüshning muhim terkibi qismi, musteqiliqqe qarshi turup, birlikke kélishtiki siyasiy mes'uliyet we burch telipining muhim qollanmisi” iken.

Bu pa'aliyet amérika-teywen munasiwiti kücheygen, amérika awam palatasi Uyghur kishilik hoquq qanuni maqullap, prézidéntning imza qoyushigha yollighan shundaq prézidént tramp amérikaning xongkonggha tutqan soda, sayahet jehettiki alahide imtiyazini bikar qilghan mezgilde ötküzülgen. Közetküchilerning qarishiche, xitayning mushundaq mezgilde mexsus pa'aliyet ötküzüp, bu qanun maqullan'ghanliqining 15 yilliqini xatirilishi diqqet qozghaydiken.

Yighinda yene xitay azadliq armiyesining birleshme bash shtab bashliqi li zochéng teywenni tinch birlikke keltürüsh ishqa ashmisa uninggha qoral ishlitidighanliqini bildürgen. Uning tekitlishiche, eger teywenni “Tinchliq bilen birlikk keltürüsh mumkinchiliki qalmisa, xelq azadliq armiyesi teywenni öz ichige alghan pütün memliket xelqi bilen birlikte barliq zörür tedbirlerni qollinidiken”. Lékin u bu xil zörür tedbirlerni qachan ishlitidighanliqini chüshendürmigen.