Uyghur rayonining qanun chiqirishta “Jungxu'a milliti ortaq éngi” ni chiqish qilishi telep qilindi

Uyghur rayonining yerlik qanun chiqirish xizmitide 2017-yilidin bashlap keng kölemde mejburiy omumlashturuluwatqan “Jungxu'a milliti ortaq éngi” din ibaret yéngi kimlikni chiqish qilish telep qilin'ghan. Nöwette yerlik qanun chiqirishta “Jungxu'a milliti kimliki” ni chiqish qilishtin ibaret bu yüzlinishning rayonda bashqa kimliklerni qanunsizliqqa élip bérish xewpi zor endishe peyda qilmaqta. “Shinjang géziti” ning 9-öktebir xewer qilishiche, Uyghur aptonom rayonluq xelq qurultiyi da'imiy komitétining partiye guruppisi yéqinda shi jinpingning ürümchide toxtap, Uyghur aptonom rayoni we bingtu'enning “Shinjangni idare qilish” doklatni anglighanda bergen yolyoruqini öginish toghrisida arqa-arqidin ikki qétim yighin achqan.

Yighinda, Uyghur aptonom rayonluq xelq qurultiyining mudiri zumret obul rayonning qanun chiqirishta, nazaretchilikte we wekillik xizmitide “Jungxu'a milliti ortaq gewdisi éngi” ni aldinqi chiqish nuqtisi qilishni tekitligen. Zumret obul sözide “Jungxu'a millitining ortaq xaraktéri” ni kücheytip, “Jungxu'a milliti ortaq gewdisi éngi” ni xelq qurultiyining qanun chiqirish, nazaretchilik we wekillik xizmitide aldin oylishish kéreklikini bildürgen. Uning éytishiche, qanun chiqirishni qanunni omumlashturush we qanun-tüzüm nazaretchiliki bilen birleshtürüp, asasi qanun, qanun we qanun-tüzümlerning ünümlük emililishishni asasi nuqta qilish kérek iken.

Zumret obul bu sözlerni b d t kishilik hoquq kéngishining mutexessisliri Uyghur aptonom rayonluq xelq qurultiyi 2015-yili chiqarghan “Ashqunluqni tügitish nizami” ni xelq'ara kishilik hoquq ehdinamilirige xilap, dep körsitip, xitay da'iriliridin mezkur nizamni bikar qilishni yaki jiddiy tüzitishni telep qiliwatqan bir waqitta éytqan. B d t mutexessislirining éytishiche, Uyghur aptonom rayonining “Ashqunluqni tügitish nizami” diniy ashqunluqni keng hem müjmel sherhilep, yüz minglighan Uyghurning tutqun qilinishigha yol achqan iken.