Xitay hökümiti Uyghur élida “Qanun boyiche idare qilish” ning “Üch séstima” sini tekitlimekte

Xitay hökümiti yéqindin buyan rayonda hedep asasiy qanunni öginish, qanun boyiche ish körüsh dégenlerni tekitlimekte.

Xitayning “Tengritagh tori” ning xewirige qarighanda, 6-dékabir küni Uyghur aptonom rayonluq hökümet yighin chaqirip, “Memuriy qanun ijra qilish teshwiqat sistémisi, qanun ijra qilish jeryanini xatirilesh sistémisi we asasiy qanun ijra qilish hem qarar chiqirish qanun tekshürüsh sistémisi” qatarliq “Üch séstima” ni yolgha qoyghanliqini jakarlighan.

Yighinda 20-nöwetlik xitay memliketlik qurultayning rohini tetqiq qilish we yolgha qoyush, shi jinpingning qanun bilen idare qilish idiyesini tetqiq qilish we yolgha qoyush bilen birge yene, qanun bilen idare qilish, memuriy qanun ijra qilishning “Üch sistémisi” ni yolgha qoyush, qanunni qattiq, qéliplashqan halda ijra qilish qatarliqlar telep qilin'ghan.

Diqqet qozghaydighini shuki, yighinda söz qilghan Uyghur aptonom rayonining re'isi erkin tuniyaz qatarliqlar “Barliq jaylar we tarmaqlar qanunni ijra qilghanda shi jinpingning qanun bilen idare qilish idiyesi bilen qorallinip, emeliyetke yétekchilik qilishi we xizmetni ilgiri sürüshi kérek” dep tekitligen.

Xitay hökümitining Uyghur élida yéqinqi 4 ay mabeynide yürgüzgen qattiq qamal tedbirliri sewebidin ahaliler bina we olturaq rayonlargha solinip qélip, ürümchidiki bir binagha ot ketken we nechche onlighan insan hayatidin ayrilghan idi. Bu weqe Uyghur rayonidiki xitay ahalilirinimu qattiq narazi qilip, bir qatar naraziliq namayishlirining yüz bérishige pilte bolghanindi. Mana mushundaq bir shara'itta, xitay da'irilirining rayonda hedep qanunni ijra qilish heqqide jar sélishi, bolupmu shi jinpingning atalmish “Qanun arqiliq idare qilish” idiyesini bazargha sélishi, diqqet qozghimaqta.

Dunya Uyghur qurultiyining bayanatchisi dilshat rishit bu heqte inkas qayturup, xitayning Uyghur élida qanun bilen bashqurushni tekitlishi hemde shi jinpingning pikrini qanun'gha yétekchi qilishni tekitlishi, rayondiki qattiq qamal, basturush we irqiy qirghinchiliq siyasetlirining yenimu qattiq ijra qilinidighanliqini körsitip béridu, dédi.

Xitay hökümitining Uyghur élida yolgha qoyuwatqan keng kölemlik tutqun we jaza lagérliri siyasitining emeliyette shi jinpingning biwaste buyruqi bilen ijra qiliniwatqanliqi, aldinqi yillarda xitay kompartiyesining mexpiy höjjetliri arqiliq ashkarilinip ketken idi.