Xitay hökümiti qazaqistan bilen tömür yol qatnishini kücheytishni pilanlimaqta

Xitayning hökümet taratquliridin “Tengritagh tori” we “Shinjang géziti” torining 19-féwraldiki xewiride déyilishiche, Uyghur aptonom rayonluq partkom sékrétari ma shingrüy bilen hökümet re'isi erkin tunyaz 2-ayning 19-küni ürümchide qazaqistan döletlik tömür yol shirkiti diréktori sawlanboyéw bashchiliqidiki ömek bilen körüshken. Söhbette ular nuqtiliq qilip Uyghur éli bilen qazaqistan otturisidiki tömür yol qatnishi we mal toshush liniyesini téximu tereqqiy qildurushni muzakirileshken.

Ma shingrüy bu yighinda xitayning “Bir belbagh bir yol” qurulushida muhim rol oynawatqan tömür yol qatnishi we mal toshush yollirini yenimu tereqqiy qildurush, chöchek-ayaguz tömür yoli qurulushini ilgiri sürüshning muhimliqini otturigha qoyghan. Sawlanbayéwmu ikki terepning sodisi we muhim ul eslihe qurulushini ilgiri sürüshni ümid qilidighanliqini bildürgen.

Rusiyening ukra'ina urushini toxtitish heqqide söhbetke kélishi we xitayning buninggha arilashturulmasliqi xitayda “Bir belbagh bir yol qurulushi” ning istiqbalidin ensiresh peyda qiliwatqanliqi melum. Mushundaq weziyette élip bérilghan bu söhbet, xitayning xelq'ara weziyettiki dawalghushlargha köre tedbir éliwatqanliqini körsetmekte.

Qazaqistanda yashawatqan iqtisadiy jughrapiye mutexessisi sheripjan nadirof radiyomizgha qilghan sözide, chong siyasiy jughrapiye küchliri otturisidiki ziddiyetning küchiyiwatqanliqini, bularning arisida qalghan qazaqistandek döletlerning rusiye bilen xitaydin teng paydilinishi kéreklikini, eng muhimi téxnika we sapada özini küchlendürüshi kéreklikini tekitligenidi.