Qazaqistan turan téléwiziyesi xitayning teklipi boyiche ili wilayitide programma ishleshke bashlighan

Xitay bilen qazaqistan munasiwetlirining küchiyishige egiship, xitay da'iriliri qazaqistan taratqulirini Uyghur rayonigha kirgüzüp, yéngi teshwiqat dolqunini qozghighan.

“Xitay xewerliri” torining 29-may küni bergen xewiride éytilishiche, qazaqistan turan téliwiziyesining süretke élish guruppisi teklipke bina'en Uyghur rayonigha kélip,  5-ayning 17-künidin 27-künigiche ili oblastining qorghas, künes, nilqa, toqquztara we ghulja nahiyeliride programma ishlesh üchün ziyaret élip barghan. Ular asasliqi Uyghur rayonining  meshhur sayahet nuqtilirini tonushturup programma ishleydiken.

Xewerde éytilishiche,  2024-yil xitayning “Qazaqistan sayahet yili” bolup, xitay hökümiti qazaqistan'gha köplep sayahetchi ewetishtin ilgiri xitayning qazaqistan'gha yéqin kélidighan sayahet nuqtiliri we qazaqlarning turmushini ulargha körsitip, “Xitay bilen qazaqistan otturisidiki chüshinish we dostluq”ni ilgiri sürmekchi bolghan.

Turan téliwiyesi süretke élish guruppisi ili wilayitidiki nahiyelerni we chirayliq tagh-deryalarni, “Bextlik yashawatqan xelq”ni körüp, goya “Shéwitsariyening güzel menzirisini körgendek” bolghanliqini, qazaqlarning tulpar ussuli we Uyghurlarning chine ussulini  körüp, “Özgiche tesirat alghanliqi ”ni bildürüshken.

Xewerde déyilishiche, qazaqistanning döletlik taratqusi Uyghur rayonida emeliy ziyaret élip bérip, sin körünüshliri arqiliq “Shinjangning heqiqiy ehwali”ni anglatmaqchi we “Shinjang hékayisi”ni ottura asiyagha tonushturmaqchi bolghan iken. Xitay hökümitining gherb taratqulirining Uyghur rayonini ziyaret qilish teleplirini ret qilip, xitay bilen munasiwiti yéqin bolghan yaki iqtisadiy jehettin xitaygha béqinip qalghan ottura asiya döletlirining taratqulirini teklip qilip, Uyghur rayoni heqqidiki teshwiqatlirini bazargha sélishi, küchlük diqqet qozghimaqta. 

Xitay hökümiti yéqinda ottura asiyadiki besh dölet, jümlidin qazaqistan prézidéntini xitaygha teklip qilip, “Dostluq we tereqqiyat”ni yéngi pellige kötüridighanliqini jakarlighanidi. Xitay hökümiti ottura asiya döletliri bilen bolghan munasiwetni kücheytish üchün medeniyet alaqisi we sayahetchilikni kücheytishni pilanlighan bolup, teshwiqatmu uning muhim bir türige aylan'ghan. Qazaqistanda yashawatqan gi'o-iqtisad mutexesisi shéripjan nadirof ependining radiyomizgha bildürüshiche, xitayning meqsiti qazaqistanning bayliqini herbiy küch bilen emes, belki yumshaq küch, yeni teshwiqat we medeniyet singdürmichiliki  bilen igilesh iken.