Тәйбей вақти гезити: «хитайниң қилмиши ирқий қирғинчилиқтур»

Мухбиримиз әркин
2019-04-15
Елхәт
Пикир
Share
Принт

Тәйвәнниң «тәйбей вақти гезити» 13‏-апрел тәһрират мақалиси елан қилип, хитай һөкүмитиниң уйғурларни юқири техника арқилиқ кәң көләмлик тәқиб қилиш, йиғивелиш лагерлириға қамаш, мәдәнийити вә диний етиқадини вәйран қилиш, мәсчитләрни чеқиш қилмишлириниң «ирқий қирғинчилиқ» қа киридиғанлиқини илгири сүргән.

Мақалидә қәйт қилинишичә, шуңа, америка билән явропа иттипақи 1989‏-йили йүз бәргән «тйәнәнмен қирғинчилиқи» да хитайға йүргүзгән қорал-ярақ ембаргосини бикар қилмаслиқи, бәлки техиму күчәйтиши керәк икән. Мақалидә, хитайниң уйғур районидики һазирқи қилмиши б д т ниң 1948‏-йили мақуллиған ирқий қирғинчилиқ һәққидики әһдинамисиниң ирқий қирғинчилиққа бәргән тәбиригә чүшүдиғанлиқи илгири сүрүлгән.

Мақалидә қәйт қилинишичә, хитай илғар тәқибләш техникаси арқилиқ өз пуқралирини бастурушта, болупму тибәт вә уйғур районидики бастурушта нурғун қилмишларни садир қилған. Мақалидә, ройтерс агентлиқиниң хәвири нәқил кәлтүрүлүп, ройтерсниң сүний һәмраһ арқилиқ уйғур районидики 39 орундики «қайта-тәрбийәләш» лагериниң 3 һәссә кеңәйгәнликини байқиғанлиқи, йеқинда әнгилйәдики бир тор бәтниң керийә наһийәсидики 800 йиллиқ һейтгаһ җамәсини чеқивәткәнликини дәлиллигәнлики билдүрүлгән. Мақалидә илгири сүрүлүшичә, һазирқи әвладлар үчүн натсислар германийәсиниң җаза лагерлирида йүз бәргән ишларни инкар қилиши қийин болғандәк бундақ әһвалда, охшашла башқа дөләтләр, рәһбәрләр вә ширкәтләрниң хитай билән «нормал алақә қилиши» қийин болуши керәк икән. Мақалидә йәнә, бейҗиң мәйли милйонлиған мусулманлар қамалған җаза лагирлирини «қайта тәрбийәләш лагерлири» десун яки шөһрәт закир ейтқандәк «ятақлиқ мәктәп» десун «униң мәқситиниң охшаш» икәнлики, у болсиму «уйғурларниң мәдәнийити, тили вә диний етиқадини системилиқ йоқитиш» икәнлики тәкитләнгән.

Пикирләр (0)
Share
Толуқ бәт