Хитай даирилири қизилсу чегра районидики көчмә нопусларни башқурушни күчәйткән

“хитай хәвәрлири” ториниң 2024-йил 1-январ күни чиқарған хәвиригә қариғанда, хитай даирилири “чегра районниң бихәтәрликини қоғдаш, чеградин кирип-чиқидиғанларни қаттиқ башқуруш” тәдбирлирини йолға қойған. Буниң түрткисидә, қизилсу области ақчи наһийәси қияқчат чегра сақчиханиси бу җайдики көчмә нопусларни омумйүзлүк ениқлашқа башлиған. Сақчилар бу чегра райондики көчмә аһалини, уларға өй иҗарә бәргәнләрни тәкшүрүп, көчмәнләрниң қачан бу җайға кәлгәнлики, кириш сәвәби, немә иш билән шуғуллинидиғанлиқи қатарлиқларни бирму бир тәкшүрүп архип турғузған; иҗаридә олтуруватқан яки завутларниң ятақлириға орунлашқан көчмә нопусларни туюқсиз тәкшүрүп, уларниң омумий санини ениқлиған; уларниң ичидики “илгири җинайәт өткүзгәнләр, бикартәләпләр, салаһийити ениқ болмиғанлар” ни өйму өй тәкшүрүп, уларни назарәт қилиш вә башқурушни күчәйткән.

 “хитай хәвәрлири” ториниң өткән йил 6-айда бәргән хәвиридә, мәзкур чегра районда һарақ ичип җедәл чиқиридиғанларниң көпийип кәткәнлики, шуңа йәрлик сақчиханиниң кечидә чарлаш елип бериватқанлиқи хәвәр қилинғаниди.

Бу хәвәрдә гәрчә, бу җайға сирттин кәлгән нопусниң хитай яки башқа милләт икәнлики ениқ дейилмигән болсиму, уларниң ичидә хитайниң зулумидин қечип қирғизистанға чиқишниң пурситини издәватқан уйғурлар яки бу җайға иш издәп кәлгән хитай аққунлириниң болуши мумкинлики тәхмин қилинмақта. Униңдин башқа, хитай даирилири “чеграни қоғдаш” баһаниси билән, бу җайда олтурақлашқиниға узун болған уйғур, қирғиз вә башқа милләтләрни техиму қаттиқ назарәт вә тәқиб астиға алған болуши мумкин икән.