Xitay da'iriliri qizilsu chégra rayonidiki köchme nopuslarni bashqurushni kücheytken

“Xitay xewerliri” torining 2024-yil 1-yanwar küni chiqarghan xewirige qarighanda, xitay da'iriliri “Chégra rayonning bixeterlikini qoghdash, chégradin kirip-chiqidighanlarni qattiq bashqurush” tedbirlirini yolgha qoyghan. Buning türtkiside, qizilsu oblasti aqchi nahiyesi qiyaqchat chégra saqchixanisi bu jaydiki köchme nopuslarni omumyüzlük éniqlashqa bashlighan. Saqchilar bu chégra rayondiki köchme ahalini, ulargha öy ijare bergenlerni tekshürüp, köchmenlerning qachan bu jaygha kelgenliki, kirish sewebi, néme ish bilen shughullinidighanliqi qatarliqlarni birmu bir tekshürüp arxip turghuzghan؛ ijaride olturuwatqan yaki zawutlarning yataqlirigha orunlashqan köchme nopuslarni tuyuqsiz tekshürüp, ularning omumiy sanini éniqlighan؛ ularning ichidiki “Ilgiri jinayet ötküzgenler, bikartelepler, salahiyiti éniq bolmighanlar” ni öymu öy tekshürüp, ularni nazaret qilish we bashqurushni kücheytken.

 “Xitay xewerliri” torining ötken yil 6-ayda bergen xewiride, mezkur chégra rayonda haraq ichip jédel chiqiridighanlarning köpiyip ketkenliki, shunga yerlik saqchixanining kéchide charlash élip bériwatqanliqi xewer qilin'ghanidi.

Bu xewerde gerche, bu jaygha sirttin kelgen nopusning xitay yaki bashqa millet ikenliki éniq déyilmigen bolsimu, ularning ichide xitayning zulumidin qéchip qirghizistan'gha chiqishning pursitini izdewatqan Uyghurlar yaki bu jaygha ish izdep kelgen xitay aqqunlirining bolushi mumkinliki texmin qilinmaqta. Uningdin bashqa, xitay da'iriliri “Chégrani qoghdash” bahanisi bilen, bu jayda olturaqlashqinigha uzun bolghan Uyghur, qirghiz we bashqa milletlerni téximu qattiq nazaret we teqib astigha alghan bolushi mumkin iken.