Хитайниң “қоли” ниң америка дөләт мәҗлисигичә йетип кәлгәнлики муназирә қозғиди

Хитайниң иқтисадий күчини ишқа селип туруп башқа дөләтләр һөкүмәтлиригиму тәсир көрситишкә урунуватқанлиқи йеқиндин буян күчлүк муназирә темиси болмақта.

Бу һәқтә “вашингтон почтиси” гезитиниң хәвәр қилишичә, хитайниң бу һәрикитиниң ипадилири америка дөләт мәҗлисидиму аллиқачан көрүлгәнлики мәлум.

Хәвәрниң аптори җош рогинниң ейтишичә, өткән ай америкиниң монтана шитатидин болған палата әзаси ситив дейни монтана штатиниң хитайға 200 милйон доллар қиммитидә кала гөши сетиш һәққидә содилашқанлиқини җакарлиған. Узун өтмәйла хитай буниң пайдисини көргән. Йәни 5-декабир күни, палата әзаси ситив дейни хитай компартийәсиниң тибәткә мәсул рәһбәрлирини күтүвалған. Арқидинла хитайниң “хәлқ гезити”, америка дөләт мәҗлиси әзалири хитай һөкүмитиниң тибәттә муһитни қоғдаш вә у йәрдики миллий мәдәнийәтни қоғдаш йолида қиливатқан хизмәтлиригә юқири баһа бәрди, дәп хәвәр тарқатқан.

Җош рогинниң ейтишичә, америка палата әзаси дейниниң юқиридики бир мисалниң өзила хитайниң иқтисадий күчни қоллинип, башқа дөләтләр сияситигә, болупму уларниң хитайни тәнқидләйдиған тәнқидий пикирлик сиясәтлириниң алдини еливатқанлиқини көрситип беридикән. У мақалисидә “әгәр хитай һөкүмити америка палата әзалирини өзиниң депини чалидиған қиливәткән болса, у һалда вәзийәт биз ойлиғандинму еғир,” дәп агаһландурған.

Йеқинда австралийә вә йеңи зеландийә қатарлиқ дөләтләр парламентлиридиму хитай билән четишлиқи бар бәзи парламент әзалириниң қилмишлири ашкарилинип, зор ғулғула пәйда қилған иди.