Shi jinpingning rusiye ziyariti némini közleydu?

Xitay re'isi shi jinpingning yéqinda rusiyege ziyaretke baridighanliqi yéqindin buyan herqaysi axbarat wasitilirining muhim témisigha aylandi. Yene kélip bu qétimqi ziyaretning ukra'ina urushi bashlan'ghanliqigha bir yil bolghan mezgilge toghra kélishi bu jehette köpligen pikirlerge sorun hazirlidi.

“Jenubiy xitay seher pochtisi” gézitining 31-yanwardiki obzorida éytilishiche, shi jinpingning bu qétimqi moskwa sepiri asasliqi rusiye bilen xitay otturisida ukra'ina urushi sewebidin kélip chiqqan bir qisim “Hang” larni yépish, shuningdek ikki terep otturisidiki iqtisad we soda alaqisini kücheytishni meqset qilghan. Emma her ikki terep mushu qétimliq ziyaret arqiliqla ular otturisidiki köpligen mesililerning hel bolup kétishige ishenchi yoqluqini bildürgen.

Roytérs agéntliqining bu heqtiki xewiride éytilishiche, rusiye terep bu heqte inkas bildürüp: “Shi jinpingning moskwagha kélishi ikki terep munasiwitidiki muhim weqelerdin hésablinidu. Xitay herqachan bizning yéqin dostimiz” dégen. Emma shi jinpingning bu qétimqi ziyariti xitayning tashqi munasiwet ishliridiki bir qétimliq namayende, dep qariliwatqan bolup, bu qétimqi ziyarette xitayning rusiye bilen yaki amérika bashchiliqidiki gherb dunyasi bilen bir septe turushi yene bir qétim ayding bolidiken.

Béyjing shehiridiki siyasiy analizchi ding gang bu heqte “Jenubiy xitay seher pochtisi” gézitige söz qilip: “Xitayning ukra'ina urushidiki mewqesi yawropaning xitay heqqidiki qarishini tüptin özgertiwetti. Bu menidin alghanda rusiyening ukra'inagha tajawuz qilishi xitaygha selbiy tesir körsetti” dégen. Xitayning rusiyeni “Tajawuzchi” dep eyibleshni hemde gherb dunyasi élan qilghan iqtisadiy jaza tedbirlirige awaz qoshushni ret qilishimu xitayni xelq'arada tenqidke muptila qilghan. Shunga bu qétimliq seperning qandaq netijilerge érishishi izchil hersahening diqqitide bolup kelmekte.