Xitay bash ministiri li chiyang rusiyege medet bérishke kelgen

Rusiyege ziyaretke barghan bash ministiri li chiyang 8-ayning 21-küni rusiye pirézidénti wiladimir putin bilen körüshken bolup, xitay bilen rusiye munasiwitining tarixta misli körülmigen derijige yetkenlikini, rusiyege iqtisadiy, siyasiy jehettin dawamliq yardem béridighanliqini, ikki terep soda munasiwitini dawamliq kéngeytidighanliqini bildürgen. Yéqinda qayturma hujumgha ötken ukra'ina armiyesi rusiye zéminigha ichkirilep kiriwatqan we rusiyening heywisi yerge uruluwatqan bir waqitqa toghra kelgen bu ziyaret, xitayning jiddiy kirizisqa qalghan rusiyege yardem bérishke kelgenlikini bildürmekte.

“Amérika birleshme agéntliqi” ning bu heqtiki xewirige qarighanda, rusiye pirézidénti putin xitay bash ministiri li chiyang bilen ötküzgen söhbitide, rusiyening xitay bilen iqtisad we bashqa türlerdimu “Zor kölemlik pilan” tüzgenlikini éytqan. Bu pilanning néme pilan ikenliki ashkarilanmighan bolsimu, rusiyening kelgüsige munasiwetlik herbiy pilan bolushi mumkinliki texmin qilinmaqtiken. Ikki dölet bashliqliri söhbet ötküzüwatqan peytte, rusiye armiyesi kurski rayonigha bésip kirgen ukra'ina armiyesini chékindürüshke tirishiwatqan bolup, urush 3-heptige qedem qoyghan. Urush bashlan'ghandin buyan moskwa tunji qétim ademsiz uchaq (Drone) hujumigha duch kelgen.

Amérikadiki ukra'inaliq siyasiy analizchi aléksandér motil ( Alexander J. Motyl) 22-Awghust “Töpilik” torida élan qilghan maqaliside, bir yil burun isyan kötürgen yéwgini prigozhindin kéyin rusiye ichide putin'gha qarshi yene bir isyan chiqqanliqini, rusiyediki bir xususiy herbiy shirket xojayini gi'orgi zakréwiskining xelqqe xitab qilip, “Ulugh putin” ni aghdurup tashlashqa chaqirghanliqini bildürgen.