Русийә хитайниң җәнуби деңизда русийә билән бирлишип маневир өткүзүш баянатиға қарита инкас билдүрмигән

Хитай дөләт мудапиә министирлики 9 - айда русийә билән бирликтә җәнуби деңизда бирләшмә һәрбий маневир өткүзидиғанлиқини җакарлиған.

Хитай мудапиә министирлики бу учурни өткән пәйшәнбә күни, йәни 27 - июл күни ашкарилиған иди.

Америка авазиниң 29 - июлдики бу һәқтики хәвиридә көрситилишичә, русийә ташқи ишлар министирлики һазирғичә 9 - айда җәнубий хитай деңизида өткүзүлидиған бирләшмә маневир һәққидә һечқандақ өз қаришини билдүрмигән.

Русийәниң “хәвәрләр” агентлиқи,“лента”, “вести” торлири вә башқа учур васитилириниң һәммиси хитай мудапиә министирликиниң мәзкур бирләшмә маневир һәққидики баянати асасида хәвәр бәргән болуп, русийә тәрәпниң пикри оттуриға чиқмиған.

Русийә анализчиси антон мардасофниң 30 - июл күни “әркин мәтбуат”торида елан қилған мақалисидә оттуриға қоюлушичә, хитай дөләт мудапиә министирлики баянатчиси бу қетимқи бирләшмә маневирниң җәнубий деңизниң қайси җайида болидиғанлиқиға аит конкрет орунни ейтмиған.

Илгири русийә деңиз күчлири муавин адмирали виктор кочемазов “деңиздики өзара һәрикәт - 2016 -” дәп аталған маневирға русийиниң тинч окян филотиниң кәм дегәндә төт парахот әвәтидиғанлиқини билдүргән иди.

12 - Июл күни гаагадики хәлқара сот хитайниң җәнубий деңиздики талаш - тартиш үстидики аралларға қарита тарихи игилик һоқуқи йоқлуқини қарар қилип, икки күндин кейин русийә тәрәп өзиниң бу аралларға болған талаш - тартишта тәрәп тутмайдиғанлиқини вә өзиниң һечқайси тәрәпни қоллимайдиғанлиқини билдүргән иди.

Русийә билән хитай деңиз күчлириниң бирләшмә маневири 2012 - йилидин тартип өткүзүлүп келиниватқан болуп, 2013 - йили япон деңизда, 2014 - йили, шәрқий хитай деңизниң шималида, 2015 - йили, оттура йәр деңизи вә япон деңизида өткүзүлгән иди.