Rusiye xitayning jenubi déngizda rusiye bilen birliship manéwir ötküzüsh bayanatigha qarita inkas bildürmigen

Xitay dölet mudapi'e ministirliki 9 - ayda rusiye bilen birlikte jenubi déngizda birleshme herbiy manéwir ötküzidighanliqini jakarlighan.

Xitay mudapi'e ministirliki bu uchurni ötken peyshenbe küni, yeni 27 - iyul küni ashkarilighan idi.

Amérika awazining 29 - iyuldiki bu heqtiki xewiride körsitilishiche, rusiye tashqi ishlar ministirliki hazirghiche 9 - ayda jenubiy xitay déngizida ötküzülidighan birleshme manéwir heqqide héchqandaq öz qarishini bildürmigen.

Rusiyening “Xewerler” agéntliqi,“Lénta”, “Wésti” torliri we bashqa uchur wasitilirining hemmisi xitay mudapi'e ministirlikining mezkur birleshme manéwir heqqidiki bayanati asasida xewer bergen bolup, rusiye terepning pikri otturigha chiqmighan.

Rusiye analizchisi anton mardasofning 30 - iyul küni “Erkin metbu'at”torida élan qilghan maqaliside otturigha qoyulushiche, xitay dölet mudapi'e ministirliki bayanatchisi bu qétimqi birleshme manéwirning jenubiy déngizning qaysi jayida bolidighanliqigha a'it konkrét orunni éytmighan.

Ilgiri rusiye déngiz küchliri mu'awin admirali wiktor kochémazow “Déngizdiki öz'ara heriket - 2016 -” dep atalghan manéwirgha rusiyining tinch okyan filotining kem dégende töt paraxot ewetidighanliqini bildürgen idi.

12 - Iyul küni ga'agadiki xelq'ara sot xitayning jenubiy déngizdiki talash - tartish üstidiki arallargha qarita tarixi igilik hoquqi yoqluqini qarar qilip, ikki kündin kéyin rusiye terep özining bu arallargha bolghan talash - tartishta terep tutmaydighanliqini we özining héchqaysi terepni qollimaydighanliqini bildürgen idi.

Rusiye bilen xitay déngiz küchlirining birleshme manéwiri 2012 - yilidin tartip ötküzülüp kéliniwatqan bolup, 2013 - yili yapon déngizda, 2014 - yili, sherqiy xitay déngizning shimalida, 2015 - yili, ottura yer déngizi we yapon déngizida ötküzülgen idi.