Nyu-yorkta xitay “Saqchi ponkiti” ni bashqurghan 44 xitaygha jinayi jawabkarliq délosi turghuzulghan
2023.04.24
Amérika edliye ministirliqi xitayning amérikada mexpiy “Saqchi ponkiti” qurup, xitay jama'et xewpsizlik ministirliqigha wakaleten amérika puqralirigha yaki amérikada turushliq ahalilerge qarita parakendichilik jinayiti sadir qilghan 44 neper xitay puqrasi üstidin jinayi jawabkarliq délosi turghuzghan.
Amérika edliye ministirliqining sherqiy nyu-york rayonluq teptish ishxanisi 22-april yuqiriqi 44 kishi üstidin ayrim-ayrim ikki délo turghuzghanliqini élan qilghan. Merkizi ispaniyediki “Qoghdighuchilar” teshkilatining qeyt qilishiche, xitayning bu xil “Saqchi ponkitliri” kanadaning montériyal, wankowér, toronto؛ amérikaning san-fransésko, hyuston sheherliri, shundaqla minisota, nébraska shtatliridimu pa'aliyet élip baridiken.
Melum bolushiche, amérikaning sherqiy nyu-york rayonluq teptish ishxanisi xitay j x ministirliqining 40 neper xadimi we xitay tor bashqurush idarisining 2 emeldarini “Siyasi qarishi xitay xelq jumhuriyiti hökümitidin perqliq bolghan amérika ahalilirini nishan qilip chégra halqighan basturushta bolush” jinayiti bilen eyibligen. Amérika edliye ministirliqining qeyt qilishiche, eyiblen'güchiler amérika we chet ellerde yashaydighan xitay öktichilirini parakende qilish we qorqutush üchün tiwittér qatarliq ijtima'iy alaqe supilirida minglighan saxta tor shexslirini yaratqan we qollan'ghan iken.
Eyibnamide, bu kishilerning amérika tor supilirida söz erkinlikini basturushqa urun'ghanliqi, xitay öktichilirining démokratik söz-heriketlirige qarshi xitayning hökümet teshwiqatlirini tarqitip kelgenliki tekitlen'gen. Amérika edliye ministirliqining bildürüshiche, eyiblen'güchilerning hemmisi xitayda yaki asiyadiki bashqa döletlerde yashaydiken. Yuqiriqi ikki délodiki xitay j x ministirliqining 34 neper emeldari, dölet halqighan tehdit we parakendichilik qilmishlirida bolush bilen eyiblen'gen bolup, ularning xitay j x ministirliqida ishleydighanliqi yaki chet eldiki xitay öktichilirini nishan qilghan “912-Alahide xizmet guruppisi” gha qaraydighanliqi tekitlen'gen.