Xitay, shangxey hemkarliq teshkilatigha eza döletler yashlirigha “Xitay medeniyiti” boyiche terbiyelesh lagéri orunlashturghan
2024.04.18
Xitay hökümiti shangxey hemkarliq teshkilatigha eza döletlerdin kelgen yash-ösmürlerni Uyghur élida “Xitay medeniyiti bilen tonushush bahar pesillik lagér pa'aliyiti” ge orunlashturghan.
Shinxu'a torining xewiridin qarighanda, “Xitay tili köwrüki” dep nam bérilgen bu lagérning échilish murasimi 4-ayning 15-küni shinjang pédagogika uniwérsitétida ötküzülgen bolup, uninggha rusiye, qazaqistan, qirghizistan, tajikistan, özbékistan, hindistan, pakistan we iran qatarliq 8 dölettin kelgen 500 ge yéqin yash qatnashqan iken.
Xewerde déyilishiche, bu pa'aliyet xitay ma'arip ministirliqining orunlashturushi we shinjang Uyghur aptonom rayonluq ma'arip nazaritining sahibxaniliq qilishi bilen échilghan bolup, “Balilar 15 künlük lagér jeryanida xitay tili öginidiken we jungxu'a medeniyiti bilen chongqur tonushidiken.”
Süretlik xewerde, bu yashlarning xitay tili öginiwatqan, moy qelem bilen mesnewi yézishni öginiwatqan we xitayche sen'et nomurliri körüwatqan körünüshliri tarqitilghan. Hetta xitay mu'ellim ulargha xitayche chay ichish we demlesh medeniyitini ögetken. Melum bolushiche, Uyghur éli Uyghurlarning qedimi medeniyet yaratqan, mol medeniyet en'enisige ige bolsimu, lékin mezkur yashlargha Uyghur medeniyiti tonushturulmighan. Hemme nerse jungxu'a milliti medeniyiti ramkisi astida tonushturulghan.
Shangxey hemkarliq teshkilati eslide xitay hökümitining Uyghur rayonini öz ichige alghan ottura asiya rayonining muqimliqini közlep turup, rayon döletliri bilen herbiy hemkarliqni kücheytishni meqset qilip qurulghan. Biraq, yéqinqi yillardin buyan xitay hökümiti bu teshkilatni özining Uyghur diyaridiki irqiy qirghinchiliqini aqlaydighan teshwiqat wasitisige aylanduruwalghanidi.
Xitay da'iriliri ilgiri “Shangxey hemkarliq teshkilati 2023-yilliq sayahet yili munbiri” ning échilish murasiminimu Uyghur élida ötküzüsh arqiliq, atalmish “Shinjang sayahetchiliki” ni ottura asiyagha we xelq'aragha yüzlendürüshning barghanche chongqurlishiwatqanliqini, “Shinjang yaxshi jay” dégen siyasiy teshwiqatni pütün dunyagha tonutushqa shara'it hazirliniwatqanliqini teshwiq qilghanidi.