Amérika dölet mudapiye ministirliqi xitayning shyawmi qatarliq yene 9 shirkitini “Qara tizimlik” ke aldi

Amérika dolet mudapiye ministirliqi 14-yanwar bayanat élan qilip, xitayning herbiylerge chétishliq yene 9 sherkitini “Qara tizimlik” ke alghanliqini bildürdi. Bu 9 shirketning ichide xitayning dangliq eqliy téléfon shérkiti shyawmimu bar iken. Amérika dölet mudapiye ministirliqining bayanatida: “Ministirliqimiz xitay xelq jumhuriyitining herbiy-puqra birikme tereqqiyat istiratégiyesige alahide diqqet qilish we uninggha qarshi turushni qarar qildi. Bu istiratégiyede bu xitay shirketlirining érishken ilghar téxnika, tejbirbe we tereqqiyati xitay azadliq armiyesining zamaniwélishish tereqqiyatini qollash üchün ishlitilgen bolup, ular özini puqrawi shérketler, uniwérsitétlar we tetqiqat programmiliridek körsitip keldi,” déyilgen.

Amérika dölet mudapiye ministirliqi bu qétim “Qara tizimlik” ke kirgüzgen 9 shirket shyawmi, lokang téxnologiye shirkiti, xitay döletlik awiyatsiye guruhi, ilghar mikro toqulma eswabliri shirkiti, gowén yérim ötküzgüch shirkiti qatarliqlarni öz ichige alghan. Amérikadiki CNBC qanilining xewer qilishiche, jüme küni shyawmining aksiye baziridiki pay chéki 10. 6 Pirsent chüshüp ketken.

Xitayning béyjinggha jaylashqan mezkur shirkiti 2020-yili dunyadiki 3-chong eqliy téléfon ishlepchiqirish shirkiti bolup bahalan'ghan idi. Awstraliye istiratégiyelik siyaset inistitutining ötken yili élan qilghan doklatida, shyawmining Uyghurlarni mejburiy emgekke séliwatqan 82 dangliq xelq'ara markining biri ikenliki ashkarlan'ghan. Melum bolushiche, amérika dolet mudapiye ministirliqining qararidin kéyin, amérikaliqlarning bu shirketlerge meblegh sélishi yaki ularning paychékini sétiwélishi cheklinidiken.