Әнглийәлик бәзи сәрмайидарлар хитай ширкәтлиригә мәбләғ селип, уйғурларниң дәпсәндә қилинишиға ярдәм бериш билән әйибләнди

Әнглийәдики бәзи сәрмайидарлар уйғурларниң кишилик һоқуқни дәпсәндә қилишқа қатнишиватқан хитай технологийә ширкәтлиригә мәбләғ селиш билән әйибләнгән.

Әнглийә “The Times” (“вақит”) гезитиниң 15‏-июл ашкарилишичә, әнглийә парламентиниң бәзи әзалири аберден стандарт мәбләғ селиш ширкити, фиделитй, срөдер қатарлиқ пенсийә фонди вә мәбләғ гуруһлирини өз ичигә алған бәзи әнглийә сәрмайидарлириниң хәйкаң, дахуа қатарлиқ хитай технологийә ширкәтлиридә 800 милйон фонд стерлиң пай чеки барлиқини ашкарилиған.

Хәвәрдә, бу ширкәтләрниң мәблиғиниң хитайниң уйғур районида кишилик һоқуқни дәпсәндә қилишиға ярдәм бериватқанлиқи тәкитләнгән. Ғәрбтики бәзи сәрмайидарларниң хитай технологийә ширкәтлиригә мәбләғ селип, униң уйғурларни бастуруши вә тәқиблишигә ярдәм бериватқанлиқи йеңи ашкариланған мәсилә болмисиму, лекин бу әнглийә таратқулириниң тунҗи қетим буниңға бәзи әнглийә сәрмайидарлириниң иштирак қилғанлиқини паш қилишидур.

Илгири америкадики бәзи ширкәтләрниң хәйкаң, дахуа қатарлиқ хитай технологийә ширкәтлиригә мәбләғ салғанлиқи ашкариланған. Бәзи орунлар қолидики бу икки ширкәтниң пай чекини сетиветидиғанлиқини билдүргән. Хитайниң хәйкаң технологийә ширкити билән дахуа технологийә гуруһи хитай һөкүмитиниң уйғур районида дигитал назарәт системиси қуруши, 2 милйондәк уйғур вә башқа хәлқләрни лагерларға қамаштәк қилмишлирида униңға техникилиқ ярдәм берип, ғайәт зор пайдиға еришкән. Нәтиҗидә, бу икки ширкәтниң пай чеки тез өсүп, бәзи ғәрб сәрмайидарлириниң қизиқишини қозғиған иди. Әнглийә “The Times” гезитиниң хәвиридә, хәйкаң ширкитиниң аз дегәндә уйғур районидики икки аталмиш “қайта тәрбийәләш лагери” ниң камерасини тәминлигәнлики, бу лагерларда бир милйондәк уйғурниң тутуп турулуватқанлиқи тәкитләнгән. Хәвәр қәйт қилинишичә, әнглийә парламент әзалири бәзи әнглийә сәрмайидарлириниң хәйкаң вә дахуа технологийә ширкәтлиригә мәбләғ селип, уйғур районидики еғир кишилик һоқуқ дәпсәндичиликини қолайлаштурғанлиқини билдүргән.